Lectura rumantscha

Era cun pli pauc cuntent

Tge vuls l’emprim? La buna u la schletta novitad? Jau vegn l’emprim cun la buna: Origen survegn dapli daners che fin ussa da las vischnancas da la regiun, dentant betg la summa totala che l’instituziun culturala aveva pretendì. La Regiun Alvra aveva proponì sin basa d’ina clav da repartiziun per mintga vischnanca in import. Tschertas vischnancas eran prontas da pajar quel, autras dentant betg. Giovanni Netzer, il manader d’Origen, è tuttina fitg cuntent.

In crimi avant ils gieus olimpics

I tuna quasi sco il cumenzament d’in crimi: In um fa resistenza cunter ils Gieus olimpics Milano-Cortina 2026 cun transparents vi da sia chasa a Livigno. E lura vegn el arrestà da la polizia pervi d’in vegl schluppet da ses tat. Tenor ses cumpogn na dastga el perfin gnanca pli discurrer cun las medias. Da la vart uffiziala n’è d’udir nagut, perquai ch’i sa tracta d’in cas pendent. Da sperar èsi che il cas na fineschia betg sco in crimi.

In tetg cun pipistrels ed ina sfendaglia

Sche tut ils abitants da la baselgia d’Andiast pajassan tschains-chasa, lura fissi pli lev da finanziar la sanaziun dal sanctuari. Ma ils pipistrels che han chattà in dachasa en la baselgia abiteschan natiralmain per nagut sut il tetg en. Uschia sto la Plaiv catolica da Breil chattar autras vias per ramassar ils 1,8 milliuns francs per la remedura dal bajetg ch’è urgenta. Tras ina sfendaglia en il tetg vegn numnadamain en aua. E quai na plascha probablamain era betg als pipistrels.

Bun divertiment cun la Lectura Rumantscha!