Lectura Rumantscha

Recurs aviatics, in transport spezial e l’ultim «mais da pais» da l’onn 2025. Quai è la Lectura Rumantscha dad oz.

In viadi tras il december 2025

Sas ti anc, tge ch’è capità quest december? Exact: la Rumantschia ha tschernì il pled da l’onn, a Küblis è l’aua vegnida tschufragnada ed il cumbat politic pervia da l’iniziativa che vul smesar las contribuziuns per la SRG SSR ha cumenzà. Quai èn trais tematicas che David Truttmann commentescha en la rubrica «Mais da pais».

Il viadi da Venanzi Caduff

Quantas giadas has ti gia pensà vi da las victimas da la guerra da l’Ucraina? Damai: Mo cun pensar vegn la situaziun entant betg meglra, quai ha forsa era Venanzi Caduff da Tavanasa pensà. E zac, ditg e fatg. L’um da prest 80 onns è sa decidì da purtar in auto en il pajais da guerra. Quest auto vegn duvrà là per divers transports, per part da la sanitad e da l’armada. Clicca qua per leger l’entira istorgia.

In viadi tras las instanzas giuridicas

Sin la plazza aviatica a Samedan na partan betg mo ils eroplans da ritgs e bels che passentan lur dis da festa cun caviar, schampagner e mantels da pel (tge clichés!). Era la plazza aviatica sezza procura per travasch – ma plitost politic. Entant fa ella in viadi tras las instanzas giuridicas. La decisiun dal pievel da finanziar la renovaziun da la plazza sto pervia dad in recurs vegnir revalitada dal Tribunal federal.

Bun divertiment e buna fin da l’onn!