«Nossa chasa maina ün pa ajer frais-ch illa regiun»

Chloé Müller: La stagiun d’inviern d’eira davo il müdamaint illa gestiun da l’hotel intensiva, güst al cumanzamaint. Intant s’ha la situaziun però stabilisada. Nus vain gnü üna fich buna stagiun da stà, cun bleras nozzas, festas da famiglia ed otras occurrenzas.

Lea Hummel: Dürant l’eivna d’eira ün pa plü quiet, ma praticamaing mincha fin d’eivna giraiva alch i’l Scuol Palace. Quai d’eiran occurrenzas privatas ed adüna darcheu eir publicas sco concerts, prelecziuns e workshops. E lura eir occurrenzas plü grondas sco ün festival da tango cun passa 200 partecipantas e partecipants. O il Multiplay-Festival cun raduond 500 visitaduras e visitadurs. I giraiva propa bain, tanteraint nu gnivna bod na plü davo cun trattar tuot las dumondas ed annunzchas.

Gaetano Romano: L’on 2025 vain nus plü co redublà nos schmertsch in congual cun l’on 2024. Ed il trend es adüna amo creschaint.

Lea Hummel: Invers inoura haja forsa fat l’impreschiun chi saja gnü plü quiet, nus nu vain tscherchà las lingias grossas. Ma sco manzunà, pro nus han gnü lö propa bleras occurrenzas i’ls ultims mais. Eir nossa bar d’eira adüna averta. E listess riva eir uossa minchatant amo glieud quia chi dumonda tuot stutta: «Es l’hotel darcheu avert?» Nus nu vain neir ingüna explicaziun plausibla per quai.

Chloé Müller: Per la stagiun da stà in mincha cas. Dürant quella vaina ospità eir bleras occurrenzas privatas chi nu sun gnüdas propagadas publicamaing, perquai nu s’haja forsa neir na s’inaccort da quellas. 

Lea Hummel: I s’ha intant confermà cha quist lö es bain adattà ed eir dumandà sco hotel e località per evenimaints. Quai es üna buna basa per ans sviluppar.  

Lea Hummel: Nus fain il pussibel per reguardar tuot las dumondas per occurrenzas. Quellas derivan tant our da la regiun sco d’utrò.  

Gaetano Romano: Nus vain ün grond interess da collavurar culla regiun. L’hotel s’inclegia eir sco inragischà localmaing. Al principi december ha per exaimpel gnü lö pro nus ün concert dal chantadur rumantsch Mattiu, pro quel han gnü eir Cinzia Regensburger ed ün cor cun uffants da la regiun üna rapreschantaziun. Quai d’eira üna da las occurrenza chi s’ha clermaing drizzada ad ün public indigen. E da quella sort occurrenzas han lö pro nus adüna darcheu.

Chloé Müller: Nus elavurain uossa fingià dumondas ed occurrenzas per l’on 2027.

Gaetano Romano: Nossa perspectiva es il 21avel tschientiner … Spass a part: Natüralmaing nu’s saja mai che chi capitarà, ma nus vain üna perspectiva a lunga vista. Eir scha nus nu contestain chi’s tratta intant amo adüna d’ün proget in elavuraziun e chi dà amo bler da far. Ma il proget as sviluppa, vain realisà pass per pass. La sporta da wellness da l’hotel es darcheu in vigur. Nos hotel es ün dals pacs cun ün bogn cuvernà illa regiun, eir quel es intant darcheu in funcziun. E nus ingrondin nossa sporta gastronomica. Sper il restorant indic Nimaya daja quista stagiun d’inviern ün’ulteriura sporta. Eu less eir manzunar amo cha nus agin cul consens dal proprietari. El es persvas da nos concept e til sustegna eir.

Lea Hummel: Tenor mai nun es quai insolit chi’s douvra al principi duos, trais ons per provar oura tscherta roba. In quella fasa nun es forsa tuot amo perfet, ma quai tocca lapro e nun es nosch. Cur chi s’ha provà oura differentas sportas as riva in üna fasa plü a lunga vista cun mans e peis. Nus lain esser üna chasa chi’d es averta per tuottas, tuots e tuot. E las experienzas cha nus vain fat intant muossan cha quai funcziuna vairamaing eir bain.

Gaetano Romano: Intant es quai pür amo üna reserva da fabrica. Ma nus eschan fingià daspö l’on 2022 landervia da ponderar, co chi’s pudess ütilisar la part vers ost da l’edifizi per üna sporta da sandà. Ma quai dürarà amo ons, quai es ün’intenziun a lunga vista. E scha la Büvetta vain uossa lura eir restorada, lain nus resguardar eir quai pro’l svilup da nossa sporta. Quai füss lura il retuorn al origen, adattà al preschaint. Sandà es ün megatrend dal 21avel tschientiner. E quel as lascha bain cumbinar cun cultura e divertimaint.

Lea Hummel: Vairamaing es tuot fingià avantman in quist lö. I nun es necessari d’inventar tuot nouv, i’s po eir retuornar a l’idea d’origen. I’s disch bain eir chi’s dess includer l’istorgia per rivar inavant. A mai para important da na be far ponderaziuns davart l’hotel, ma dad includer tuot l’areal da Nairs i’ls plans. La collavuraziun cul center da cultura – ed eu sper bainbod eir culla Büvetta — am sta a cour. Il potenzial da quist lö cumpiglia l’aspet artistic e quel da sandà. Eu salüdess, sch’eir las funtanas tschüffessan darcheu daplü attenziun. La Büvetta d’eira il center dal turissem da cura illa regiun. Ed id es ura e temp da tilla revitalisar darcheu.

Gaetano Romano: Quai es intant amo avert e dependa eir ferm da quai cun chi chi’s collavura. Imaginablas sun collavuraziuns tant cun partenaris regiunals sco cun partenaris internaziunals. L’idea da basa es: Illa part vers ost da l’edifizi dess esser la sandà i’l center. Nus lain ütilisar quella part per üna sporta cha nus nun offrin intant amo intensivamaing: Wellness, sandà, programs da «longevity». Tuot che chi nu pretenda intervenziuns medicinalas ma serva a la sandà es imaginabel. Ünsacura saran lura apunta eir darcheu accessiblas tuot las funtanas d’aua forta a Nairs. Intant es quai be il cas pro la funtana Carola.

Chloé Müller: Eu dschess cha quel barat vain adüna plü intensiv. Sco ün dals pacs albiergs illa regiun vain nus l’avantag da pudair metter a disposiziun d’ün mumaint a tschel blers lets. Güst pro occurrenzas plü grondas sco la coppa mundiala da snowboard a Scuol collavurain nus perquai strettamaing cullas organisaziuns turisticas. Nus vain l’infrastructura per ospitar tuottüna blers giasts e pudain eir organisar occurrenzas per gruppas plü grondas. Pro la prosma coppa mundiala da snowboard nun es quai amo previs concretamaing, ma perche na arrandschar quia pro nus üna jada eir üna premiaziun?

Gaetano Romano: Nus stain eir directamaing in contact cul cumün chi’ns supporta fermamaing. Il barat cullas instituziuns ans es fich important ed ans güda eir.

Chloé Müller: Eu less eir amo agiundscher cha nus contribuin eir a l’attractività da la regiun turistica cun nossa sporta. Nossa chasa maina ün pa ajer frais-ch ed ün oter public illa regiun. Scha nus organisain ün festival da tango, imprenda ün’otra cliantella a cugnuoscher nossa regiun. E nus sperain natüralmaing cha quella tuorna lura darcheu plü tard. Na in prüma lingia pro nus, ma illa regiun.

Gaetano Romano: Dürant l’inviern passa il bus da sport ses jadas al di eir quia a Nairs, là eschan nus dimena bain ragiundschibels. E pels giasts da l’hotel spordschain nus eir ün shuttle. Ma eir la colliaziun a la rait dal trafic public dürant tuot l’on es in discussiun. Quai dürarà però amo ün temp, là sun invoutas eir instanzas chantunalas. Ma id es sgüra da resguardar: Intant es quia a Nairs avantman l’hotel e’l center da cultura. Scha la Büvetta es lura ün di eir darcheu averta, saraja amo plü important chi’s riva a Nairs eir cul trafic public. Nus vain il plain sustegn dal cumün per gnir darcheu collià a la rait dal trafic public.

Chloé Müller: E pro occurrenzas culturalas spordschain nus da nouv ün «bus da cultura» chi maina il public ün’ura avant cha l’occurrenza cumainza da Scuol pro nus a Nairs – e davo darcheu inavo a Scuol.

Gaetano Romano: Schi’s lascha dvart las investiziuns illa infrastructura, lura scrivain nus fingià uossa cifras nairas. Eventualas famas da nossa mort sun evidaintamaing exageradas. (ria)Amo nun es realisà tuot quai cha nus vain intenziunà. E nus staran far amo blers pass. Ma tuot es instradà ed as sviluppa illa dretta direcziun. Eir sch’intant nu’s renda amo minchüna da nossas occurrenzas culturalas: Quella sparta es part e restarà part da nos concept, quella tocca pro nossa identità. 

Lea Hummel: Ed id es in nos interess chi dà vita in chasa. Nus vain fin uossa adüna chattà üna via. Nus tuots vain lavurà vi da la bar, vain puli, eschan sezzats davo la recepziun. Intant eschna üna squadra bler plü gronda, in quella cha tuottas e tuots as pon concentrar sün quellas cumpetenzas ch’els portan aint il team. Eu sun clermaing persvasa cha quist proget po funcziunar.

Chloé Müller: Nus eschan ün tröp multifari da glieud talentada chi’s cumplettescha bain. Quai fa oura a nus. Nos potenzial nun es amo lönch na trat a nüz dal tuot.