Skiunz grev blessau ei morts

Sco quei che la Polizia cantunala dil Grischun scriva en ina communicaziun als mieds da massa, era il skiunz svizzer ella vegliadetgna da 35 onns il gliendisdis suentermiezdi da viadi silla pista en direcziun Nagens dil territori da skis da Laax. Tenor empremas enconuschientschas eis el vegnius giud pista en in liug cun carauns. El ei ruclaus en in liug cun neiv loma e collidaus cul nas d’in grep. Schegie ch’el purtava capellina, eis el vegnius blessaus grevamein. Igl emprem agid ei vegnius prestaus da tiarzas persunas ed il survetsch da pista SOS dall’Arena Alva ha garantiu igl emprem provediment. Igl um ei vegnius tgiraus medicinalmein dil team dalla AAA Alpine Air Ambulance e sgulaus da quel el Spital cantunal dil Grischun a Cuera. Leu eis el morts la sera da Silvester en consequenza dallas blessuras. Communablamein culla Procura publica ha la Polizia alpina instradau l’inquisiziun pertuccont il decuors digl accident.