Evito il caos sülla lingia dal Bernina

Pel gerant da la staziun a San Murezzan, Adrian Lombriser es la prüma fin d’eivna dal december passo sto ün mumaint chi l’ho aviert ils ögls: Grazcha a la bell’ora d’eiran ils trens davent da Tirano tenor el uschè ferm occupos cha bgers passagers cun bigliets valabels haun stuvieu ster in pè u nun haun brich pudieu fer il viedi fin San Murezzan. «Per eviter reclamaziuns da vart dals passagers ho la Viafier Retica stuvieu reagir», ho’l dit invers RTR, «e decider püssas imsüras.»

Cun dapü capacited

«Nossa finamira cun quistas imsüras d’eira dad eviter trens plains stagnos sül traget Tirano – San Murezzan», ho cuntinuo Adrian Lombriser ed ho preschanto quistas imsüras: «Las principelas includivan ün augmaint da capacited da 600 plazzas supplementeras al di, e quai cun ün tren regiunel e Bernina Express supplementer in tuottas duos direcziuns.» Cha que saja eir gnieu installo ün sistem da sclusas a Tirano ed a San Murezzan, ho declaro l’impiego da la VR, «uscheja s’ho que pudieu separer ils passagers e passageras cun plazza reserveda i’l Bernina Express da quels cun ün bigliet normel pel traget.» Quistas imsüras sun per intaunt limitedas fin düraunt il mais schner.

Ils resultats vegnan prosmamaing analisos

Tenor Adrian Lombriser haun las imsüras cha la VR ho introdüt funcziuno: «Las passageras ed ils passagers cun üna reservaziun pel Bernina Express haun chatto lur plazzas pajedas. Ils oters passagers però haun minchataunt stuvieu spetter il prossem tren.» Cha que saja difficil da planiser, manzuna il gerant da la staziun da viafier a San Murezzan, Adrian Lombriser, «perque cha nus nu savains brich quaunta glieud per di chi voul fer il viedi.» El s’impaissa ch’eir düraunt las prosmas fins d’eivna saro bgera glieud in viedi traunter Tirano e San Murezzan. «Perque es que uossa da guarder scha las imsüras vegnan mantgnidas eir auncha düraunt ils prossems mais.»