Gasettas, corda e forsch

Navair, igl è bel da tegnair enta maun ina gasetta da palpiri? La gasetta è – en cumparegliaziun cun telefonins e tablets – simplamain in gaudi per egls e nas: sfegliar las paginas, savurar il palpiri, vesair l’entir artitgel impaginà, stgarpar or in text per al metter da la vart, dar ina part da la gasetta a la vischina da maisa … Tge bellezza!

Però cler, suenter avair duvrà il Blick, il Tages-Anzeiger ed il Pöschtli, capita cun tut quest palpirom il medem, independentamain da la qualitad dals artitgels: Las gasettas sa tschentan tar il palpiri vegl. E precis qua cumenza la battaglia. Tutgais Vus tar quellas persunas che rimnan las gasettas en satgs da palpiri? – Quai fissi atgnamain d’evitar … – Pia èsi da liar las gasettas en simpels faschs. Cun corda e forsch. Ma co va quai il meglier?

Ils 2 – 3 trics principals aveva jau atgnamain emprais avant var 30 onns. Ma mintga giada, sche jau hai ina pluna da gasettas davant mai sin maisa, vegn la medema dumonda: Co va quai puspè? Co èsi da liar ensemen las gasettas, per che quellas na crodian betg or dal fasch avant la rimnada?

Finalmain hai jau chattà la soluziun, ironicamain sin il telefonin! Igl è in video da duas minutas cun il titel «Zeitungen binden». Quel declera pass a pass quanta corda ch’igl è da prender, co ch’igl è da far il nuf e co trair suren e suten la corda. Aifer secundas datti in fasch da bellezza. Pia recumond jau a Vus: Betg leger la gasetta sin il telefonin, mabain mo guardar sin quel co liar ensemen las gasettas da palpiri!

Il video da Youtube che mussa co far faschs da gasetta.