L’affar cun la nauscha conscienza

Mes talents manuals èn plitost modests. Tuttina possed jau dus sets eguals da tirastruvas spezials. Quels tirastruvas n’èn dentant betg adattads per struvas da normala grondezza. A mai paran els plitost sco guaffens filigrans per in urer.

Daco pomai hai jau lura acquistà gist dus sets da quels tirastruvas? Propi cumprà n’hai jau betg quels. Els m’èn vegnids tramess dad in’organisaziun d’agid, senza che jau avess empustà els – natiralmain ensemen cun in cedel da pajament.

Quests tirastruvas n’èn dal reminent betg ils unics objects malnizzaivels en mes tegnairchasa. Jau possed tranter auter era chalenders da giaglioffa, chartas geograficas, lupas, cullis, etichettas cun mia adressa privata e.u.v. Tut tramess a mai d’organisaziuns d’agid. L’emprim trametteva jau regularmain enavos quests products betg giavischads cun ina curta notizia che jau na vuless betg pli retschaiver chaussas che jau na sappia betg duvrar.

Gidà n’han mias stentas nagut. Jau survegn anc adina tirastruvas filigrans da miserabla qualitad ed autras chaussas inutilas. Ma jau desist en il fratemp da trametter enavos quests products. Sco ch’i para èsi gia calculà en en ils quints da las organisaziuns che quests utensils vegnan regularmain dismess, senza che las organisaziuns survegnissan ina donaziun. Il medem schabegia era cun las numerusas brevs da supplica. Ellas svaneschan savens betg avertas en la rimnada da palpiri vegl.

Per betg chapir mai fallà: Jau sun absolutamain pront da far donaziuns ad instituziuns che fan dal bun ad umans che na vivan betg sin la vart sulegliva dal mund. Ma per far quai na dovr jau betg brevs da supplica cun grossas broschuras che nagin na legia. Dacurt hai jau perfin retschavì en in di trais da quellas brevs. Insaco hai jau gì il sentiment che quellas brevs da differentas organisaziuns sajan vegnidas tramessas il medem mument dal medem speditur extern. Quai numn’ins oz «outsourcing».

Ma quest bumbardament da brevs da supplica na tanscha apparentamain anc betg. Dapi in temp survegn jau adina dapli e-mails, sms e telefons d’instituziuns che ma dumondan per in sustegn finanzial. Ina da quellas instituziuns m’ha telefonà dacurt perfin la saira. Essend che quest’instituziun sustegna persunas che pateschan da la medema malsogna nuncurabla sco in bun ami da mai, hai jau ditg al telefon che jau saja pront da donar 50 francs. «Quai n’è betg pussaivel», m’ha la dunna ditg cun ina vusch in zichel memia datscherta. Il minimum sajan 100 francs, perquai ch’i sa tractia d’ina contribuziun per in project spezial. E sch’ella na rabitschia betg ensemen ils daners necessaris enfin la proxim’emna, stoppian els desister da quel project fitg impurtant per ina gruppa da pazients giuvens. Jau hai finalmain dà mes consentiment per betg stuair patir da nauscha conscienza.

Charas organisaziuns d’agid. – Jau hai magari schon il sentiment che vus faschais sbagls gravants en il marketing. Dumandar per donaziuns n’è betg in affar tenor las reglas dal martgà. Donaziuns èn e restan ina chaussa dal cor. Or da quel motiv met jau a vus a cor da reponderar seriusamain vossas metodas da marketing pulit agressivas. Trametter tirastruvas malnizzaivels ni metter donaturs potenzials sut squitsch moral na gida a lunga vista a nagin. L’affar cun la nauscha conscienza n’è tenor mai betg in concept persistent. El unfisescha. E quai na po betg esser en voss interess.

Pieder Caminada da Castrisch è stà blers onns schurnalist tar la «Süd­ostschweiz». Dapi l’october 2021 è el pensiunà.