Quater mungias ella Fermata

Per la stagiun d’unviern porscha la Fermata a Falera puspei ina varietad accumpignonta tier las occurrenzas da teater e musica. Avon 20 onns han Verena e Paul Casutt instradau in’exposiziun d’art, quella ei daventada in punct fix el program da cultura dalla casa da cultura La Fermata. Denter Nadal e Daniev ei la vernissascha d’ina nova exposiziun stada. A quella ha la cumissiun da menaschi cun Reto Schwitter e Regula Caduff-Blumenthal, en collaboraziun cugl organisatur actual Armin Spescha, beneventau in triep visitadras e visitaders. «Art ord la claustra» ei il tetel dall’exposiziun ch’ei da veser quest’unviern. El foyer ed els zulèrs dalla Fermata san ins admirar sculpturas e maletgs da quater mungias creativas. Treis dad ellas vivan aunc oz en claustra. La quarta, sora Anita Derungs, ei morta gl’october 2020 ella vegliadetgna da 99 onns ella claustra da Glion.

Annadas 1921, 1931 e 1941

Da sora Anita ein mo paucas ovras exponidas. Siu grond relasch artistic ei daferton spatitschaus en casas privatas, instituziuns e locals publics. Ella Fermata san ins admirar quater acquarels e quater sculpturas dad ella. Ina da quellas, il sogn Cristoffel, ha sora Anita formau e culau en bronz.

Sora Pia Willi, l’anteriura priura dalla claustra da Müstair, muossa l’emprema gada en Surselva sias ovras d’art. Naschida 1931 a Turitg eis ella diesch onns pli giuvna che sora Anita. Sora Pia Willi passenta la sera dalla veta els mirs claustrals a Müstair. Dad ella pendan diesch dessegns d’in agen lungatg artistic. Sora Pia documentescha, cun empau humor e fins strehs, la veta e la lavur dalla pintga cuminonza benedictina.

Puspei diesch onns pli giuvna, dall’annada 1941, ei sora Caritas Müller. Ella viva ella claustra da Cazas nua ch’ella creescha dapi varga 50 onns sculpturas da ceramica. Ella ei enconuschenta el sectur dalla ceramica e vala sco experta da quella sparta digl art figurativ. Per baselgias, claustras e privats ha ella fatg fetg biaras ovras. A Falera san ins admirar 14 objects da tematicas cunzun religiusas.

Maletgs che expriman cuminonza

Ina consora da sora Caritas ha embelliu musicalmein la vernissascha dall’exposiziun. Sora Maria ha sunau l’arpa e dau plaid e fatg al moderatur Armin Spescha. Suenter ch’ella ei entrada 1993, cun 21 onns ella claustra da Cazas, ha ella entschiet a s’occupar artisticamein. Dad ella san ins admirar iconas tradiziunalas e maletgs da cuntradas e carstgauns. Sia visiun seigi da cumbinar il sacral e la tradiziun dallas iconas culla pictura libra intuitiva da nies temps.

Sper la part cullas ovras dallas quater mungias san ins era veser lavurs dallas scolaras e dils scolars dil scalem superiur dil consorzi da scola Laax-Falera-Sagogn-Schluein. Quels s’accordan culla tematica dalla claustra sco cuminonza religiusa. En connex cul giubileum da 500 onns pleiv da Laax han ils giuvenils creau maletgs che expriman la cuminonza e sia muntada. Era ils maletgs dalla giuvna artista Ange-Elise Bruno cumpletteschan quella. El center da sias ovras ein harmonia, spiritualitad, etica e cuminonza.