Speronza, ventira, reflexiun

Retus Giger, il dirigent dil Chor viril Lumnezia, haveva preparau tut minuziusamein cun ses 70 umens. Buca mo cun quels. Il program ha inclus era in chor ad hoc da dunnas ed affons. En tut ha gl’auditori entupau ina formaziun gronda, in chor mischedau da bunamein 100 persunas. Pil concert cul tetel «Nadal Lumnezian» ei quel seposiziunaus el chor. Entschiet ha la scuntrada musicala ella baselgia parochiala da Pleif a Vella cugl «Andachtsjodler». Culla melodia da sgugialar tradiziunala dil Tirol dil sid ha il chor cumplessiv aviert il concert. El ha rinforzau il sentiment d’in Nadal migeivel e ventireivel.

In messadi che ha muentau

Vuschs virilas, da dunnas ed affons han intonau in program cun canzuns popularas, ina gronda part romontschas pliras tudestgas, singulas en engles, franzos e latin. Pliras han il chor viril ed il chor ad hoc cantau da cuminonza. En memoria resta al biars digl auditori il supplement. Alla fin dil concert ha la canzun «In siemi» muentau. Tras la bun’articulaziun han ins capiu bein il messadi. Il text da Silvana Candreia ha Gion Balzer Casanova mess avon 20 onns en melodia. Igl ei in messadi che vegn mai a piarder sia actualitad. El sa cunfortar e svegliar speronza en vesta a tontas crisas actualas sigl entir mund. Quella canzun dat da patertgar: Ins sedamonda daco ch’il carstgaun selai menar ad incuntin da scuidonza, disfidonza e prepotenza. Daco vulan ils pussents ir trasora en ina via tschocca? Buca mo quella canzun – cun sia idea grondiusa d’in mund pascheivel – vegn ad accumpignar beinenqual tras gl’onn niev.

Al clavazin ha il pianist indigen Martin Heisch accumpignau enquala canzun. Gl’auditori ha udiu denter autras siat popularas che Gion Antoni Derungs ha arranschau. Aschia per exempel «O stalla ventireivla», la surmirana «Dad ena frastga nescha» e la tudestga «O Heiland, reiss die Himmel auf». Frestgamein han ils affons cantau «This little light of mine». Igl ei in gospel tradiziunal che Lorenz Maierhofer ha arranschau per chor e clavazin. «Mirei co la pintga glisch rumpa, plein tarlischur, l’umbriva». Quella canzun fa part dil messadi ch’il «Nadal Lumnezian» ha derasau. Duas gadas ei la baselgia da Pleif stada fullanada ed ils concerts vegnan a restar en viva regurdientscha.