«Negin enquera il blackout»
Oz mesjamna sera ha liug a Trun en sala da cultura la premiera dal film «Senza flad – Corina Schmed va als cunfins». Realisau quel ha la protagonista sezza ensemen cun Paula Nay. Il film da RTR raquenta da Corina Schmed che vul daventar l’emprema dunna svizra che senoda cun mo ina fladada varga 159 meters sut l’aua.
Sia finamira primara seigi ei da bandunar la zona da confort e d’ughegiar zatgei niev, di Corina Schmed che lavura dapi 15 onns sco redactura e moderatura tier Radiotelevisiun Svizra Rumantscha (RTR). L’idea da contonscher la marca da senudar varga 159 meters sut l’aua cun mo ina fladada ei stada in’idea spontana dad ella. Sco ella sezza di mo paucs meins suenter ch’ella hagi casualmein scuvretg sia passiun pil sfunsar liber.
Il film «Senza flad – Corina Schmed va als cunfins» che ha premiera oz mesjamna sera a Trun accumpogna la dunna sin sia aventura da senudar senza flad sut l’aua. Il film muossa bials e meins bials muments, per exempel era quels che la sfunsadra libra vegn als cunfins corporals e mentals. La FMR ha discurriu cun Corina Schmed.
FMR: Il film exprima bein Vies entusiassem pil sfunsar liber. Cun senudar sut l’aua senza trer flad ves’ins era situaziuns dramaticas. Daco fageis Vus quei sport?
Corina Schmed: Mei fascinescha la cumbinaziun da duvrar la forza dil tgierp e la forza mentala. Il sfunsar liber ha perquei tschaffau mei naven digl emprem mument ch’jeu sun sefatschentada cun quei sport. Igl ei aunc buca aschi ditg dapi lu. Jeu vi saver tgei che miu tgierp ei habels da dumignar en ina situaziun ch’ei atgnamein pur stress e nua ch’jeu sun confruntada cugl instinct da surviver. Il sport da sfunsar liber en tut sias fuormas ei in sport nua ch’i va surtut per la forza mentala. Ed ei drova denton era in tgierp ch’ei trenaus e fits.
Co collaboreschan il tgierp ed il spért in cun l’auter cun senudar sut l’aua senza flad?
Quella colligiaziun ei zatgei dil pli grev. En miu cass: Jeu hai in tgau dir. E sche jeu insistel e catschel atras miu tgau dir, lu hai jeu mintgaton breigias da sentir ils signals da miu tgierp, perquei che mia forza mentala ei pli ferma. Per mei eis ei ina part da miu trenament da luvrar vi da quei equiliber.
Ina passascha dil film muossa co Vus haveis giu in blackout sut l’aua.
Cun encurir ils cunfins sut l’aua sa ei capitar ch’ins ha tuttenina memia pauc oxigen. Il tgierp dat denton signals. Suenter duas minutas sentel jeu forsa che mias combas vegnan staunclas e che la detta entscheiva a sfurmiclar. Quei vul denton buca dir ch’jeu sun gia en ina fasa critica. Lezza entra pér lu cura ch’jeu hai il sentiment da vegnir en in tunnel.
E sch’igl ei lu memia tard?
Ei sa dar ch’igl ei lu memia tard ed ins piarda sco jeu en quella passascha dil film la schientscha. Mintga sfunsadra ni sfunsader liber drova perquei exnum ina persuna fidada che senoda adina alla surfatscha e che sa precis co reagir, sch’ella sto salvar la sfunsadra ni il sfunsader. Era cun in blackout tuorna il flad aschi gleiti ch’ins ei puspei sur l’aua. Quei tuna ussa forsa dramatic. Negina sfunsadra ni sfunsader liber enquera il blackout. Mo sch’ei schabegia ed ins vegn ton pli spert alla surfatscha ha quei neginas consequenzas per la sanadad.
Dat ei in cunfin per Vus cun senudar sut l’aua senza trer flad?
Ei dat buca in cunfin ch’jeu schess ussa tochen cheu e finiu. In cunfin en quei senn ei per mei, sch’ei va per la segirtad. Jeu stoi ver in partenari fidau che accumpogna mei cura ch’jeu mon ell’aua. Quei ei ina cundiziun definitiva per mei da saver sefidar cumpleinamein da quella.
Questa sera ei la premiera dil film «Senza flad» che Vus haveis produciu ensemen cun Paula Nay. Tgi vuleis Vus contonscher?
Il film che vegn pli tard era emess els Cuntrasts da RTR ei ina fotografia dil mument.Quei ch’jeu vuless dir cheu ei che la lavur da tagliar il film cun tut quellas sequenzas ei stada ina fetg gronda sfida per mei, perquei ch’jeu hai luvrau vi da pliras situaziuns pér cun puspei veser ils maletgs. Jeu sun perquei stada fetg leda d’haver Paula Nay cun sia vesta objectiva e sias damondas.
Nus vulein contonscher schi biara glieud sco pusseivel cul film. En emprema lingia less jeu initimar quellas persunas che han ina finamira ni in siemi ed han tochen oz forsa aunc buca giu la curascha da far gl’emprem pass. Savens stat la tema da disgir enta peis. Sch’ins ughegia denton buca da bandunar la zona da confort, vegn quella adina pli pintga.
Tgei resuns spitgeis Vus dalla premiera a Trun?
Jeu hai marveglias e sun spanegiada sils resuns ch’ei dat. Paula Nay ed jeu havessen grond plascher, sche las aspectaturas ed ils aspectaturs san prender cun els enzatgei da nies film e sch’igl ei mo per exempel igl impuls da trer flad pli cunscientamein.
Co vai vinavon per Vus suenter il film?
La proxima concurrenza, la proxima cumpetiziun per cuntinuar la via da contonscher mia finamira ei nudada en mia agenda. Plinavon vulessel jeu uonn era sefocussar sin novas disciplinas da sfunsar liber, surtut era en la profunditad. Cun funsar ella natira, en lags, taunas ni ella mar sesarva puspei in niev mund. Quei ei tut in auter sentiment che da senudar sut l’aua en in bogn cuvretg.
Il film «Senza flad – Corina Schmed va als cunfins» vegn mussaus oz mesjamna allas 19.30 a Trun ella sala da cultura. Dumengia proxima, ils 11 da schaner 2026 allas 17.25 vegn il film emess els Cuntrasts da RTR sin SRF1.
Gust da leger dapli?