Nignas surpresas tar la repartiziun

Cun la midada digl onn ò tigl cumegn da Vaz er scumanzo la nova perioda da legislatura per las persungas tgi appartignan alla suprastanza, ma er agls oters gremis politics. Chella perioda da legislatura cozza digl 2026 anfignen e cugl 2029.

Sortias dall’executiva communala digl pi grond cumegn da Surmeir èn siva set onns commembranza Thomas Parpan e siva da quatter onns commembranza Beat Fausch. Pigls dus suprastants partents ò igl suveran digl cumegn da Vaz eligia alla fegn d’avost 2025 da nov per la suprastanza Nicole Sigron e Marco Vögeli.

Betg tenor igl prancepi usito

Alla fegn da november èn las tschintg persungas tgi appartignan alla suprastanza digl cumegn da Vaz sa radunadas per reparteir igls departamaints digls quatter mandataris e dalla mandataria. Maurin Malär, igl mastral reeligia, ò detg anvers la FMR tgi la seduta seia stada fitg constructiva, sa dada seia ena fitg bunga discussiun ed alla fegn ins vegia er catto ena soluziun cuntantevla. Igls departamaints seian betg nias repartias tenor igl prancepi tgi las persungas an uffezi dastgan deponer scu ampremas lour giaveisch chegl tgi pertotgi igl departamaint. Maurin Malär ò detg: «Igl è nia discussiuno fitg avert e mintgign ò pudia s’exprimer tge departamaint tg’el vess pitost interess da manar.» Tar chella discussiun fitg angulivada seia cunzont ia da cattar ena soluziun adattada per igls quatter commembers e la commembra dall’executiva communala, ò punctuo igl mastral Maurin Malär. Igl cumegn da Vaz ò 2700 abitants ed abitantas cun stgers 1800 votants e votantas. Ultra da chegl porscha el lavour a radond 150 persungas.

Las finanzas e l’administraziun

Maurin Malär ò chels deis scumanzo la sia sagonda perioda d’uffezi scu president communal da Vaz. Pigls proxims quatter onns vign el ad esser responsabel cunzont per las finanzas digl cumegn da Vaz e per l’administraziun communala. An sies mangs èn alloura er igl turissem, la cultura e la direcziun digl stab directiv communal.

Romano Peterlini ò igls davos quatter onns fatg part alla suprastanza digl cumegn da Vaz. El magna venavant igl departamaint furmaziun, educaziun e social. Ultra da chegl è igl anteriour deputo da nov er vicepresident digl cumegn da Vaz. Igls davos quatter onns era Thomas Parpan vicepresident communal da Vaz.

Kilian Margreth ò scumanzo igl 1. da schaner 2026 la sia sagonda perioda da legislatura. El segna er igls proxims quatter onns per la direcziun digl departamaint gôt, agricultura, pulizeia communala e pumpiers.

Nov manader pigl departamaint construcziun

L’amprema seduta da suprastanza an nova cumposiziun ò li igls 8 da schaner 2026. Lò vign er ad aveir li la confirmaziun formala dalla repartiziun digls departamaints. All’amprema seduta da suprastanza vignan er ad esser dalla parteida Nicole Sigron, la nova suprastanta, e Marco Vögeli, igl nov suprastant. Siva quatter onns appartigna cun Nicole Sigron puspe ena donna all’executiva communala da Vaz. Ella magna igl departamaint sanadad, tgesa d’attempos e tgira Parc scu er las ovras digl cumegn da Vaz.

Pigl center da sport e pigl santieri vign ad esser responsabel Marco Vögeli. El è nia eligia igl davos avost 2025 scu nov commember per la suprastanza digl cumegn da Vaz. Igl om da 38 onns magna da nov er igl departamaint construcziun, scu er an oters cumegns ed er tigl cumegn da Vaz en departamaint da gronda muntada ed impurtanza. Chel departamaint ò Marco Vögeli surpiglia da Thomas Parpan.

Igl cunsegl communal digl cumegn da Vaz ò igls 13 da schaner 2026 la sia amprema seduta ed an nova cumposiziun. Gian-Carlo Bläsi duess suandar a Michele Vitali scu president digl parlamaint digl cumegn da Vaz.