«Nus capin aunc adina buca quei»

Da Daniev endamaun allas 01.30 ei schabegiau en Sviza ina catastrofa senza paregl. Ella Bar Le Constellation a Crans-Montana ein 40 persunas mortas en consequenza d’in incendi, 119 ulteriuras ein vegnidas blessadas per gronda part considerablamein. Las biaras unfrendas ein giuvenils, per part aunc buca maiorens. Quella catastrofa ha procurau per gronda consternaziun en Svizra ed ellas tiaras vischinontas.

«Nuncapeivel»

In tal schabetg fatschenta secapescha era autras possessuras ed auters possessurs da bar, sco per exempel Christina e Pirmin Monn, possessurs e menaders dalla Bar Postigliun a Mustér. «Nus capin aunc adina buca quei», dian ils consorts che han aviert la bar avon pressapauc dus onns. Ils 2 e 3 da schaner 2026 han els giu aviert lur bar. «Nus havein giu in menaschi en regurdientscha dalla catastrofa a Crans-Montana. Cun nossa clientella havein nus giu buns discuors. Singuls han era vuliu saver co la segirtad seigi garantida tier nus. La glieud ei secapescha sensibilisada il mument per quei tema», di Pirmin Monn.

Risguardau tuttas directivas

Christina e Pirmin Monn han aviert la Bar Postigliun el miez dil vitg da Mustér en vesta alla stagiun d’unviern 2023/24. «Nus havein giu contact cull’Assicuranza da baghetgs dil cantun Grischun. Ensemen cul representant da lezza havein nus schau cussegliar tgei materials nezegiar per renovar il local. Tenor quei concept ei la segirtad garantida tier nus», dian la possessura ed il possessur dalla bar che sesanfla el sutterran dalla Casa Postigliun. El local sesanflan duas sortidas d’urgenza, leutier igl esch principal el plaunterren. «Tenor directivas dall’assicuranza ei quei sufficient e nus essan era da quei meini», di Pirmin Monn. Las duas sortidas d’urgenza ein signalisadas cun glisch, quei ch’ei medemamein in’obligaziun.

Fetg pauc material inflammabel

Ella bar ei vegniu luvrau cun fetg pauc material da lenn, igl auter ei material che sa buca pigliar fiug. Ell’alzada sur la bar ha la spartida tier la stizun – denter auter cun vestgadira – stuiu vegnir construida cun veider resistent encunter fiug. «Sin fundament dalla disgrazia a Crans-Montana savess jeu s’imaginar ch’ei dat controllas dall’assicuranza en differents locals il proxim temps. A nus sa quei esser endretg, pertgei nus essan fermamein perschuadi che zatgei semegliont sa buca succeder tier nus», di Pirmin Monn e sia consorta Christina aschunta: «Secapescha ch’ins sa mai dar la caparra cumpleina per tut, per exempel sch’enzatgi vul far enzatgei cun intenziun.»

«Tgei savess succeder tier nus?»

«Cu nus havein udiu da quella disgrazia havein nus secapescha era fatg patratgs tgei che savess succeder tier nus, pertgei nus essan responsabels per nos hosps», di Christina Monn. Ella enconuscha gest duas varts da quella catastrofa: sco possessura e menadra dalla Bar Postigliun, mo lu era sco experta diplomada per la tgira intensiva. Ella lavura parzialmein el Spital regiunal a Glion e di: «Persunas cun talas blessuras sco a Crans-Montana ston vegnir tgiradas en partiziuns specialas. Jeu sezza sai co ina blessura cun fiug vesa ora, mo cun tals cass aschi cumplexs vegnin nus buca confruntai.»

Clientella bein enconuschenta

Las mesiras da segirtad ella Bar Postigliun vegnan cumpletadas culla savida sco pumpier da Pirmin Monn ed in da ses collaboraturs che presta medemein survetsch da pumpier. «Bia glieud sa gnanc co in stezzafiug funcziuna. Per nus ha la segirtad da nossa clientella, che nus enconuschin per gronda part persunalmein, l’absoluta prioritad. Sche nus stuessen ussa aunc prender novas mesiras, sche secapess quei da sesez», di Pirmin Monn. La Bar Postigliun ha aviert mintgamai il venderdis e la sonda notg. Quest’jamna vulan Christina e Pirmin Monn informar la clientella e cun ella era ils geniturs da giuvenils davart la segirtad ella Bar Postigliun: «Nus essan dil meini che quei seigi necessari suenter quella catastrofa.»