Passa 2000 visitaders per seira

Da Son Silvester è eida a fegn siva 20 deis la 12avla ediziun digl «Zauberwald» a Lai. Eneda daple ò l’occurrenza attratg an media ple tgi 2000 persungas per seira, aint igl gôt, tgi sa catta agl our digl li turistic. Giancarlo Pallioppi, igl president digl comite d’organisaziun ed avant 12 onns egn digls iniziants principals dall’occurrenza, è fitg cuntaint cun l’ediziun 2025 digl «Zauberwald».

S’avanza ad en veir magnet

«Aint igl frataimp è l’occurrenza digl gôt magic ancunaschainta ainten l’antiera Svizra», ò Giancarlo Pallioppi managea anvers la FMR. Cura tg’ins vegia gia avant 12 onns l’ideia da realisar igl december igl «Zauberwald», ins vegia strousch chinto tgi la purscheida per l’antschatta dalla staschung d’anviern s’avanza ad en veir magnet per vigl e gioven ed ad en event da renom naziunal. Cun l’introducziun digl gôt magic ins vegia da lez taimp gia la speranza da carmalar gio avant Nadal e Bumang daples giasts ainten la regiun da vacanzas da Lai, ò menziuno Giancarlo Pallioppi. Chegl seia reuschia cun neir igl interess pigl «Zauberwald» dad onn tar onn adegna pi grond, ò detg igl president digl comite d’organisaziun digl gôt magic.

Cun en domber da passa 2000 visitaders e visitaders per seira ins vegia propi contanschia la pi ota capacitad pussebla. I fetscha an nign cass senn da far daple antradas per seira cun simplamaintg mantger aint igl gôt dall’occurrenza er igl plaz per daple gliout. D’aveir scu er tar l’ediziun 2025 digl «Zauberwald» mintga seira en’occupaziun da 90 % seia ena realitad plaschevla, ò accentuo Giancarlo Pallioppi.

Grischun, Turitg e Son Giagl

Losch ins dastga er esser tgi perveia digl gôt magic pernotteschan bleras persungas ainten la regiun da vacanzas da Lai. Graztga all’occurrenza regenerescha la destinaziun da vacanzas bung 15 000 pernottaziuns, ò menziuno Giancarlo Pallioppi. D’augmentar igl domber da pernottaziuns per la regiun da vacanzas da Lai, chegl seia er sto egna dallas fegnameiras cun introdueir avant 12 onns igl «Zauberwald». Dall’occurrenza profiteschan betg angal igls hotels ed er igls affittaders d’abitaziuns, mabagn er las bleras ustareias, cun blera gliout eir avant u siva dalla viseta digl gôt magic a tschagna. La gronda part digls blers visitaders e dallas visitadras dereiva digl Grischun, ò Giancarlo Pallioppi detg. Igls sagond blers visitaders e visitadras dereiva digls cantuns Turitg e Son Giagl, ple u manc prest en domber identic.

Angal ple 10 % compran agl li

Giancarlo Pallioppi fò er ena bilantscha positiva chegl tgi pertotga igl interess pigls ples concerts tar l’ediziun 2025 digl «Zauberwald». I seia sa musso tgi cunzont las gruppas svizras atteiran en grond public. Uscheia seian igls concerts da Lo & Loduc, Stubete Gäng e Megawatt stos an curt taimp vandias or.

Tenor Giancarlo Palliopi  ins vandeva igls amprems onns digl gôt magic 90 % digls bigliets d’antrada  gist agl li. Chegl seia sa mido fitg, uscheia ins vegia vandia 90 % digls bigliets d’antrada pigl «Zauberwald» 2025 online e tar la prevendita ed angal ple 10 % tar la cassa dalla seira.

Dad onn tar onn s’augmaintan er igls costs, ò detg igl president digl comite d’organisaziun, ed aint igl frataimp ins vegia en preventiv da radond dus milliuns francs. Er igls artists e las artistas tgi segnan per igls effects da gleisch e per las illuminaziuns aint igl gôt pretendan adegna daple gascha. D’attribueir seia chel fatg er allas bands tgi pretendan siva dalla pandemia per 50 % anfignen 100 % daple gascha. Da porscher mintg’onn anc miglra qualitad e chegl tigls concerts, tar las installaziuns da gleisch e tar la purscheida culinara seia indispensabel pigl comite d’organisaziun, tgi segna cun partenaris fidos per la realisaziun digl «Zauberwald».