«Scolaziun regulara è impurtanta»
La Polizia da fieu è en il chantun Grischun part da l’Assicuranza da bajetgs. Ed ella controllescha che las prescripziuns per impedir unfrendas dad incendis vegnian resguardadas tar bajetgs fermamain periclitads. Per ils ulteriurs edifizis èn las vischnancas responsablas. La FMR ha fatg in pèr dumondas al directur da l’Assicuranza da bajetgs grischuna Marc Handlery.
FMR: È ils sistem da controlla dal Grischun sa cumprovà?
Marc Handlery: Gea, quest sistem è sa cumprovà. Nus da l’Assicuranza da bajetgs controllain edifizis periclitads e faschain anc las controllas communalas per citad da Cuira e las vischnancas da Buseno, Calanca, Rossa e Santa Maria en Val Calanca.
Vus faschais tenor atgnas indicaziuns circa 5000 controllas per onn. Quantas vegnan contestadas?
Quai na poss jau betg dir exactamain. En media tranter 10 e 15 %.
Vossas controllas e prescripziuns vegnan magari resentidas sco schicana. Datti bleras reclamaziuns?
Tenor nossas experientschas ha nossa clientella blera chapientscha per prescripziuns e mesiras da segirtad. Sa chapescha cun cussegliar ed explitgar correctamain da nossa vart.
Impurtant èsi dentant era da scolar il persunal. Tgi è responsabel per quella scolaziun?
Ina scolaziun regulara è in’impurtanta part da la protecziun dad incendis. E per quella scolaziun è il possessur u il gestiunari dal manaschi responsabel.
Vegn quai era controllà?
Sistematicamain betg. Da nossa vart datti controllas sporadicas tar il persunal, nus vulain examinar sia savida en chaussa. Sco gia menziunà giascha la responsabladad tar ils possessurs e gestiunaris.
Vossa instituziun planisescha sco ch’i para ina campagna d’infurmaziun. Tge cuntegn quella campagna?
Communablamain cun GastroGrischun e l’uniun da l’hotellaria grischuna vulain nus regurdar ils manaschis a lur duairs pertutgant la protecziun da fieu. Principalmain ston ins tegnair liber las vias da fugia e resguardar il dumber maximal da persunas che dastgan entrar en ina stanza. Ins sto scolar il persunal e mantegnair ils indrizs da stizzar. Tar dumondas stattan noss experts gugent a disposiziun.
Gust da leger dapli?