Do or daners è tuttegna nia

Scu tgi l’Associaziun grischuna digls hoteliers Hoteleriesuisse Grischun ò communitgia marde passo on igls passa 600 hotels tgi dat aint igl Grischun luvro fitg bagn tranter Nadal e Bumang. Las reservaziuns èn s’augmentadas per 6 % e chegl an media ple u manc aint igl antier cantun.

Pendicularas cun en minus aint igl Grischun Central

Er an Surmeir è sur las festas sto occupo mintga letg e chegl anfignen igls 4 da schaner 2026. Bungs affars on alloura er fatg igls restorants cun esser ainten la regiun tants giasts scu darar vasia. Do an îgl è er tgi betg angal ainten igls lis turistics scu Beiva, Savognin, Barvogn e Lai era blera gliout per veia, er ainten las otras vischnancas surmiranas eran an gir blers turists.

Luvro ferm on cunzont las pendicularas dalla Nagiadegna Ota e dalla Nagiadegna Bassa cun en augmaint dad 11,4 % tigls skiunzs transportos. Aint igl Grischun Central è dantant do tar las pendicularas en minus da 0,4 % an cumparaziun cun Nadal e Bumang 2024/25. An media on las pendicularas grischunas alloura gia per 5,6 % daple giasts tgi anc avant en onn sur las festas alla fegn da december antschatta da schaner.

I dovra simplamaintg bell’ora

Tgi tants giasts èn stos tranter Nadal e Bumang er an Surmeir è er en maret dall’ora da belezza. Igl è er uscheia tgi sur las festas passaintan er an Surmeir blers giasts igls deis libers tgi von ansomma mianc cun skis. Chels gioldan pi gugent igls deis cun bler suglegl, sa laschan eir bagn cun magler e bever angal igl migler ed igl pi bung. Ena retschertga fatga dalla FMR tar ples ustiers e plessas ustieras da Surmeir conferma tg’è nia consumo fitg bagn e tg’è nia do or blers daners per magler e cunzont er per bever.

Janine Arpagaus, la presidenta da Gastro Alvra/Surses, ò detg sen dumonda tg’ella vegia gia trasatras reacziuns positivas d’ustiers ed ustieras, chegl tgi pertotga igl affar tranter Nadal e Bumang. Ella ò er menziuno tgi igls giasts eran da bunga luna, eran cuntaints e l’ambianza seia stada plaschevla chegl perveia dall’ora scu or digl codesch. Bungs giasts èn e restan alloura gist chels tg’on en’abitaziun da vacanzas u ena tgesa da vacanzas. Els totgan anc adegna tigls giasts igl pi fidevels. Gist chels on savens er la carta da staschung dallas pendicularas, uscheia tgi er els on renunztgia agl eir cun skis, persiva passanto daple taimp cun eir orsoura a giantar u er a tschanar.

Vegns grischuns e products regiunals

Chegl tgi pertotga la consumaziun è eneda daple sa verifitgia tgi igl segment da giasts tgi vagn tranter Beiva e Lai on gugent vegns grischuns. Per en bung got or digl Signeradi èn igls giasts er pronts da paer en bung prietsch. Da menziunar è tgi igls vegns grischuns totgan oz tar igls miglers «Pinot Noirs» betg angal dalla Svizra.

Vegns taliangs èn anc adegna en product da success, cunzont vegns d’en prietsch pi ot. Vegns dalla Spagna bevan cunzont igls Turitges, dantant tgi giasts dalla Svizra orientala prefereschan vegns grischuns. Igl è er sa musso tgi igl prietsch è tar la consumaziun pitost secundar, persiva è la qualitad da gronda muntada. Products dalla regiun èn dumandos adegna daple ed anc daple interessos èn igls giasts dall’istorgia tgi stat davos chels.