Mustér honorescha siu burgheis Armon Orlik

Las famiglias Orlik ch’ein dacasa en differents loghens grischuns e svizzers ein tuttas oriundas da Mustér. Ellas han lur ragischs egl uclaun da Disla, leu nua ch’in da lur confamigliars viva aunc oz cun sia famiglia. Tuts ein burgheis da Mustér ed aschia era Armon Orlik, il retg dils lutgaders.

Mai memia tard per honorar

«En sesez levan nus beneventar Armon Orlik gia igl onn vargau cheu a Mustér. Sin fundament da si’agenda pleina pli che pleina ei quei denton buca staus pusseivel», di il president communal René Epp. Per ina honoraziun eis ei denton mai memia tard ed aschia beneventa la vischnaunca da Mustér siu burgheis prominent Armon Orlik venderdis, ils 16 da schaner 2026 el rom dalla surdada dil Premi Desertina. «El ei nies hosp d’honur», scrivan la cumissiun dil Premi Desertina e la suprastonza communala el flyer d’invitaziun a quei arranschament. Armon Orlik ei daventaus victur dalla Fiasta da lutgar federala 2025 a Mollis el cantun Glaruna. Tgi che retscheiva il Premi Desertina vegn tradiu pér lezza sera.

Sera embellida da musica

Igl arranschament ch’entscheiva allas 20.00 ella halla Cons vegn enramaus musicalmein dalla formaziun «Cantus Avis» sut la direcziun da Rilana Cadruvi, dalla band indigena «Galiots», sco era da Laurin Bucheli cun in schatg musical sin sia harmonica. Suenter la surdada offerescha la vischnaunca in apero. Igl arranschament ei publics.