Sentir il fiug

Contas gadas sun jeu gia staus en clubs per sentir il fiug? Il fiug dil visavi, il fiug dil saltar, il fiug dils carstgauns, il fiug dall’amur. Cun contas persunas sun jeu gia staus en bars? Persuls, cun amitgs, cun partenarias, cun conluvrers e cun jasters. En contas differentas discos sun jeu gia staus en mia veta? A Dubai ella 50avla alzada, sper la mar ell’Italia, en speluncas ella Langstrasse a Turitg ed ella Treglia si Mustér. En tgei cundiziuns eran quels clubs ch’jeu sun schon staus? Certs vevan aur e certs vevan meffa vid la preit, auters vevan negina ventilaziun, plirs eran schicki micki ed enqualins eran barracas.

Tgei hai jeu tut viu en discos? Dabia. Pèrins vid far l’amur en cantuns, giuvens vid sepitgar, dunnas vid sescurlar e persunal vid la bar che mett’ils daners egl agen sac. Tgei hai jeu sez tut fatg en clubs? La damonda duess plitost esser: Tgei hai jeu buca fatg? Con biars daners hai jeu gia sfarlatau duront sortidas en bars? Tschiens e mellis da francs. Gliez segir.

Jeu sai buca contas gadas ch’jeu sun gia staus en mia veta en clubs, seigi quei sco hosp ni sco musicist vid sunar concerts. Zanua denter 300 e 400 ga segir. Hai jeu patertgau inaga vid murir duront ch’jeu erel en tals clubs? Mai. Hai jeu inaga – ils davos 17 onns – tertgau che la mort entra el local e surtila ina tal gronda part dils hosps cun la cozza dalla mort? Mai. Hai jeu – en tut quels deliriums – fatg las correctas decisiuns il dretg mument? Fetg darar.

In club, ina localitad da plascher, ei pil tenti buc in liug nua che giuvenils duessan piarder la veta. Il proxim glas ch’jeu empostel en sortida beibel per tut quels e quellas che han buc pli saviu finir lur drink ella notg da Silvester. Jeu giavischel a quels giuvenils ch’ei detti enta parvis ina bar da 24/7, cun bubrondas gratuitas per in e scadina.