Serrau la telecabina pervia da vandalissem

Cull’entschatta dil temps d’advent ei ina nova illuminaziun sepresentada el vitg da Mustér. Per dar tempra d’unviern ein las autoritads communalas sedecididas da cumpletar quella cun entgins objects che van bein aprau cugl unviern. Denter auter ei quei sutgeras ed ina telecabina. La notg dils 30 sils 31 da december 2025 ei la decoraziun dalla telecabina vegnida donnegiada. La vischnaunca ha reagiu sin quei act da vandalissem e serrau ella. Ella communicaziun plazzada sin quella scriva ella: «Deplorablamein eis ei ozildi buca pusseivel da realisar in tal project per nossa societad senza ch’ei vegni caschunau donns ni fatg enguladetschs.» Sco il meinafatschenta dalla vischnaunca, Roland Cajacob di, resta la telecabina serrada il mument. La vischnaunca appellescha allas persunas che han caschunau il donn da s’annunziar.

Buns resuns – mo era critica

L’entschatta december ha la vischnaunca aviert ufficialmein la nova illuminaziun ed embellaziun dil vitg pil temps d’unviern. Quei ei succediu en connex cun in apero, in termin ch’era denton buca fetg enconuschents. «Nus havein sappientivamein buca vuliu far memia gronda reclama persuenter, surtut per impedir discussiuns che la vischnaunca impundi ussa era aunc daners per quel», di il president communal René Epp. Consequentamein seigi quei succediu en ina rama pli sempla, mo tuttina seigi in tschuppel persunas staus presents. «Nus essan surstai positivamein dallas reacziuns per quell’illuminaziun ed embellaziun. Sin fundament da quellas vegnin nus a far l’avertura dall’illuminaziun quest onn en ina fuorma empau pli publica», di René Epp. Spels buns resuns ha la vischnaunca denton era udiu vuschs criticas. «Ei ha dau critica. In ni l’auter ei sedumandaus, sch’ei fetschi da basegns d’investar talmein en quei connex», di Roland Cajacob. Ils resuns positivs hagien denton giu claramein la surpeisa.

Atmosfera vegn appreziada

Cull’illuminaziun nova e l’exposiziun d’objects che regordan agl unviern ch’ei aunc buca propi arrivaus, ha la vischnaunca vuliu procurar per in’emperneivla atmosfera el vitg. «Nus essan dil meini che quei seigi reussiu. Per quei motiv fagein nus era ponderaziuns d’eventualmein extender quella purschida il proxim unviern», manegia il president communal. Denter ils objects exponi sesanfla era ina telecabina, quella ch’ei stada pertuccada da vandalissem denter Nadal e Daniev. Sco Roland Cajacob di, ei quella vegnida cumprada el Vorarlberg ell’Austria. L’idea ei da porscher alla glieud la pusseivladad da far in paus en quella. «Gest quella telecabina ha giu in bien resun. Nus havein schizun survegniu damondas da persunas che lavan cumprar ella», di Roland Cajacob. Suenter igl act da vandalissem resta ei ussa mo da sperar ch’ella vegni buc engulada.