Ballapei cun Spagnols e Hollandes enstagl cun Caduffs e Zalas

Miez uost ei Remy Manetsch (21) serendius els Stadis Uni dall’America, concretamein a Wisconsin. Leu – alla Carroll University da Waukesha – studegia el economia da menaschi. Il motiv per sia dimora da l’autra vart digl Atlantic ei denton buc en emprema lingia il studi. «Jeu hai la caschun d’emprender bein engles e da dar ballapei culla squadra dall’universitad», di igl um giuven da Mustér. A Trun ha el absolviu igl emprendissadi da dessignader da construcziun aulta e tier l’emprema equipa da ballapei da Schluein Glion (3. ligia) eis el giugadur da tschep.

«Pli che cuntents»

Il motiv che Remy Manetsch ei ussa per in temps ell’America ei in giug culs juniors A dil Team Surselva staus: «Suenter in giug culs juniors A ordeifer encunter Tobel/Affeltrangen sun jeu vegnius contactaus d’ina agentura da giugadurs. Quella intermediescha giuvens giugadurs en scolas dils Stadis Uni dall’America culla caschun da saver sescolar e dar ballapei leu», di Remy Manetsch. Suenter plirs discuors seigien el e ses geniturs sedecidi per quella caschun: «Per mei ei quei ina schanza unica ed jeu less buca far a memez la renfatscha in di ch’jeu hagi buca nezegiau quella.» Sur Nadal e Daniev eis el staus tier sia famiglia a Mustér. En in discuors culla FMR tila el in’emprema bilanza da sia decisiun da serender els Stadis Uni dall’America e manegia: «Jeu sun buca s’enriclaus da haver fatg quei pass. Igl ei sco jeu hai spitgau. Jeu sun pli che cuntents e selegrel da returnar ils proxims dis ell’America.»

Digl attaccader al defensur

Culla squadra da ballapei dall’Carroll University da Waukesha absolva el il campiunadi dallas scolas aultas dalla NCAA (National Collegiate Athletic Association). En ligias regiunalas emprovan las equipas dallas universitads da sequalificar pils finals naziunals. «Igl atun essan nus curdai ora els quart-finals dils playoffs, aschia ch’il campiunadi ei staus a fin ils 6 da november 2025», di Remy Manetsch. Ella secunda davosa minuta dalla prolungaziun ha la squadra adversaria sittau il gol decisiv en disfavur dall’equipa dil Sursilvan. Remy Manetsch absolva il campiunadi sco defensur dretg: «En sesez ei quei buca mia posiziun. Tier Schluein Glion dun jeu sco attaccader.» Il motiv ch’el ei vegnius plazzaus en quella posiziun ei declaraus spert: «En mia posiziun preferida dat ei entgins fetg buns giugadurs alla scola, aschia ch’jeu sun vegnius plazzaus ella defensiun.»

Nivel da 3. ligia

Mo era sco defensur fa Remy Manetsch apparentamein buna pareta: «Jeu profiteschel en mintga cass da mia spertadad e buna cundiziun. Pertuccont quella s’audel jeu denter ils megliers. Empau pli fetg hai jeu da sbatter culla grondezia d’enqual attaccader, damai ch’jeu sun cun 1,74 m buc aschi gronds.» Per el seigi quella posiziun ina nov’exeperientscha. Il nivel dallas biaras equipas en lur gruppa seigi cumparegliabels cun quel dalla 3. ligia en Svizra. Singuls giugadurs hagien schizun il nivel dalla 1. ligia.

Frenaus d’ina blessura

Remy Manetsch ei staus giugadur da tschep dalla squadra cun Spagnols, Hollandes, Croats e Norveges naven dall’entschatta. El dieschavel giug ei in attaccader lu passaus en in cumbat talmein sin siu pei seniester ch’el ha scarpau ils ligioms. Suenter ina pausa da treis jamnas ed in tractament intensiv dil pei eis el returnaus ella squadra, mo mintgamai all’entschatta sco reserva: «Tuttina hai jeu lu dau savens ina part dils giugs.» Spel studi dall’economia da menaschi ein sis dis ad jamna reservai per ina buna part per trenaments e giugs la mesjamna e la sonda. La dumengia ei di liber. «Jeu rimnel novas experientschas. Il ballapei ei fetg corporals ed ils trenaments – surtut da fitness – ein intensivs. Tacticamein eis ei buca bia auter che tier nus», di Remy Manetsch. Ils giugs ordeifer hagien menau el e si’equipa en plirs marcaus dall’America.

Anavos els Stadis Uni

Quels dis sgola Remy Manetsch anavos els Stadis Uni dall’America. Prest entscheivan lu ils trenaments e la primavera ils giugs amicabels e da preparaziun pil campiunadi digl atun. Il studi alla Carroll University cuoza quater onns. «Jeu sai aunc buca con ditg ch’jeu stun leuvi. Igl ei era pusseivel ch’jeu termineschel buc il studi e tuornel en Svizra. Miu interess ei plitost l’architectura», di Remy Manetsch. Il mument parti el la combra cun in Hollandes. Stessi el vinavon savessi el separticipar ad ina cuminonza da habitar en ina habitaziun. Il lungatg hollandes ei per el dil reminent negina barriera, damai ch’el ha empriu quel da sia mumma ch’ei oriunda dalla Hollanda.

Persequitau Schluein Glion

Malgrad la distanza tier la Surselva ha Remy Manetsch persequitau intensivamein il ballapei ella regiun, surtut da sia squadra da Schluein Glion. El seigi adina staus en contact cun plirs giugadurs. «Els han dau in fetg bien campiunadi d’atun. Cun tons buns giugadurs giuvens s’udessen nus en sesez ella 2. ligia», manegia Remy Manetsch che rimna era il proxim miez onn impurtontas experientschas per esser semtgaus pli tard per sia squadra ella Foppa. «Ils 29 d’avrel ei il davos di da scola a Waukesha. Lu ei il campiunadi regiunal aunc buca finius en Svizra. Forsa tonscha ei aunc da dar in giug ni l’auter cun Schluein Glion», manegia Remy Manetsch. Eventualmein sa el lu schizun contribuir alla promoziun ella 2. ligia.