Els mainan culurs africanas da bellezza in Engiadina

Kyondo vain nomnada la terna da sisal in Kenia chi vain fatta a man cun üna tecnica da nufs speciala. «Eu sun creschüda sü praticamaing sainza quistas unglas, perquai cha nus vain dürant noss’infanzia fat uschè bleras ternas», disch Sarah Buchli cun ün surrier e muossa seis poldsch. Ella es insembel cun seis hom Notarmon Buchli illa butia da kyondo a Sent. Chi chi passa la via principala guarda sainza vulair aint illa vaidrina da l’affar, uschè bain as preschainta quella cun ternas in tuot las grondezzas e culurs.

Ternas africanas in Engiadina – funcziuna quist model d’affar? «Fich bain dafatta», disch Notarmon Buchli. Sco sviluppader independent da software e cusgliader lavura el intant fin 50 % eir amo per kyondo, sia duonna fin a 100 %.

Da la tschiera i’l sulai engiadinais

La famiglia Buchli es gnüda a star avant duos ons a Sent. Imprais a cugnuoscher s’han Sarah e Notarmon avant desch ons a Nairobi, Kenia. Notarmon Buchli d’eira là sco als informatiker per Ringier, per metter in pè üna redacziun a l’ester per la chasa da medias. Sco fotograf amateur tscherchaiva el models – ed ha chattà a sia duonna futura.

Da l’on 2018 es il pêr culla figlia Chloe gnü a star a Turich, ün pêr ons plü tard a Bülach. «Là nu m‘haja mai sentida bain – massa pac sulai, ils umans sun reservats, blers sun stressats», quinta Sarah Buchli. Ella svessa es creschüda sü in ün cumün da muntogna duos uras davent da Nairobi. Ch’ella haja lura badà pro visitas a la famiglia da seis hom a Sent: «Quia pudessa gnir furtünada.»

Dat lavur a 25 duonnas

In Kenia sun ternas da sisal ün oget dal minchadi, chi vain ütilisà in prüma lingia per depuoner ogets. «In famiglia tillas vaina prodüt per dovrar svessa o per tillas regalar», quinta Sarah Buchli. Ch’avant la colonisaziun sajan kyondos gnüts dovrats per barattar. La producziun da ternas saja adüna statta colliada culla cumünanza, las duonnas sezzan insembel, discuorran e fan ternas. L’idea da vender ternas da sisal in Svizra haja ella gnü davo corona. «In Svizra ed eir in oters pajais europeics o in Canada vain la lavur manuala stimada fermamaing», sa ella our d’experienza. Fingià la prüma prouva da vender ternas da sisal ad «Afro-Pfingsten» a Winterthur saja stà ün grond success.

Fin dal 2024 ha il pêr vendü las ternas da sisal sün marchats in tuot la Svizra. Lura s’ha datta la pussibiltà da tour a fit la butia sper la via principala da Sent. «Uossa n’haja s-chaffi qua ün toc Africa», disch Sarah Buchli. Ed ella po sco impressaria dar a 25 duonnas in sia patria üna lavur, da quai es ella specialmaing superba. «Nus eschan ün affar da famiglia e lavurain sainza commerciants intermediars, id es ün affar fair.» Sia sour Grace s’occupa in Kenia dals contacts e dal transport. «Mincha terna es ün unicat», intuna Sarah Buchli.

Chattà a Sent ün dachasa

La famiglia Buchli as sainta a Sent bain integrada. La figlia Zoe chi ha set ons frequainta la scoula cumünala e discuorra sper inglais e suaheli curraintamaing eir rumantsch. Chloe chi cumplischa bainbod il 16avel anniversari less quist on cumanzar ün giarsunadi da conditra. Sarah ha imprais tudais-ch e gioda il sulai engiadinais, la naiv e la cumünanza in cumün chi viva. Ella as sainta acceptada a Sent. «Be a la fraidüra nu m’adüsaraja probablamaing mai», disch ella cun ün surrier.