Igl ei buca memia dultsch

Il pli grond cumpliment che ti sas survegnir a Hong Kong per in dessert ei sch’in:a Hongkonges:a gi a ti: «Quei dessert ei buca memia dultschs.» Mia petta da rieblas survegn regularmein quei cumpliment. La petta da pastgas cun ris ei era igl absolut hit, era quella buca memia dultscha. Ils vermicelles che nus havein surviu a nos hosps da Hong Kong en Svizra ha era survegniu il medem cumpliment.

Bia desserts ell’Asia occidentala ein bugen empleni cun fava cotschna, ni pli exact fava d’adzuki. Ella vegn normalmein cuschinada ad ina consistenza loma, semegliont ad in risotto plitost schetg, ni elavurau tier ina pasta. La pasta vegn bugen duvrada per emplenir mochis, omlettas ni pli exact pancakes. El Giapun dat ei per exempel quellas herzigas pettas emplenidas cun fava en fuorma da pèschs. Sco favs entirs vegn la fava d’adzuki bugen duvrada en suppas (gie, cheu fan ei suppas dultschas, also buca memia dultschas, sco dessert), pettas en glatsch. E perfin en bubble teas vegn aschuntada quella fava d’adzuki.

Quels tes cun borlas da tapioca beibel jeu era bugen. Il pli bugen il te ner da latg cun borlas, puding ballucont da pastg e puding da latg. Tschei gi hai jeu giu preschas e buca priu il temps da leger endretg il menu dalla stizun da te. Enstagl d’empustar la mischeida menziunada sura, hai jeu empustau quella da 3Qs: borlas, puding da pastg e fava d’adzuki. Cugl emprem schluc hai jeu lu scuvretg quei sbagl. Mo per l’emprema gada en mia veta ei capitau enzatgei curios: Jeu sun buca stada trumpada – sco normalmein – da quella scuvierta. La munconza dil gust dultsch ha buca deprimiu mei. Na, jeu hai tertgau: «Mmm, quei gusta lu bein – ed igl ei buca memia dultsch.» – Avon 15 onns sun jeu viagiada l’empremia gada viers l’Asia. Ei ha pia mo cuzzau 15 onns entochen ch’jeu sun daventada Asiata.

Lisa Peers Dermont è sinologa, mamma ed ­observatura da cultura che organisescha events. ­Ella viva cun sia famiglia a Hong Kong.