Obstachels

Mes gymbuddy Tom ha in corp da siemi, l’ideal da tut ils gymbros, sco ch’ils umens che fan fitness vegnan numnads ozendi. Tom è in pachet da musculs definids. Ins vesa mintga muscul dal venter. Din ils auters. Jau na guard betg uschè precis. Ma jau ves en mintga cas las egliadas da la glieud che ans vegn encunter, sche nus giain a currer a la riva dal flum – gea, Tom oben ohne. Egliadas scuidusas.

Tom è in flot schani ed el parta gugent ses secrets da fitness e da nutriment. El trenescha bler, var duas uras circa tschintg giadas l’emna ed el mangia bler protein. Tranter auter in kilo quarc al di. El na mangia betg l’entir kilo en ina giada, el al parta si en cups da 250 grams ed in da quels mangia el da marenda. Per era daventar uschè fitta e musculusa sco Tom less jau cumenzar precis là, cun mangiar 250 grams quarc da marenda. Quai è mia finamira per quest onn.

Da formular finamiras è simpel – da cuntanscher ellas in art! Almain per mai. Perquai m’occup jau intensivamain cun metodas co cuntanscher finamiras. Ina metoda è quella d’analisar ils obstachels e da’ls eliminar.

Obstachel numer 1: Mia marschadetgna. Jau sun memia marscha da prender cun mai in tschadun.

Il segund obstachel: Jau stuess la damaun, cura che jau arriv a scola l’emprim metter il quarc en la frestgera da la stanza da magistras e lura anc mender, ir a prender el cura che jau hai pausa. Ma quella stanza è sin il segund plaun e fin che jau sun là è la pausa gia bunamain passada. Sin via en la stanza da magistras schabegia savens il sequent: In uffant tschertga ses guant/putsch/rispli ed jau gid a tschertgar. Ubain: Ina collega s’agita e di che tut l’integraziun saja ina merda. Ubain: Il stampader ha in stau ed jau gid a schliar il problem. Ubain: Jau hai surveglianza da pausa. Damai datti fitg blers obstachels fin che jau sun tar mes quarc.

Ma qua vegn mes plan: Jau pachetesch ussa mintga di in pac quarc ed in tschadun en mia tastga. En quella sa chatta gea era mia corda da siglir persunala, da prender cun mai quella na sun jau betg memia marscha. Entant che jau vom lura tar la frestgera per il quarc sto mintgin che ma vegn encunter cun problems l’emprim far 100 sigls cun la corda, e jau mangel entant patgific in pèr tschadunadas quarc. Uschia cuntansch jau lura gista duas finamiras: Jau mangel mes quarc ed il pli tard suenter in’emna ma van tuts ord via durant la pausa. «Adatg ussa vegn la sbatticocca dal quarc», pensan els. Ma quai m’è tuttina – era sche jau na vegn forsa tuttina betg ad avair in sixpack sco Tom. Silmain hai jau mes paus!

Chatrina Josty-Kreuzer è pedagoga curativa e lavura a Lengnau en il chantun Berna.