Commemoraziun per l’originel da San Murezzan

El ho polariso, cumbattieu pel dret, d’eira pedant, ma eir ün bun amih – in november es Carl Adolf Häberli mort ill’eted da 91 ans. Quista sanda ho la vschinauncha da San Murezzan piglio cumgio da sieu originel.

La sela es steda plaina a la ceremonia da commemoraziun in onur da l’abitant Carl Adolf Häberli, in l’Hotel Reine Victoria a San Murezzan. Accumpagneda es la ceremonia gnida da musica e pleds festivs. Ils 15 november 2025 es Carl Adolf Häberli mort ill’eted da 91 ans (La Quotidiana vaiva rapporto ils 23-11-2025). Amihs e cuntschaintas s’haun inscuntros in sanda passeda per piglier cumgio da l’originel da San Murezzan. «El d’eira pedant ed ho grittanto l’administraziun cumünela– ma eau d’he adüna gieu ün bun contact ed al d’he respetto», ho dit Christian J. Jenny, il president cumünel da San Murezzan invers RTR. El al tegna in buna memoria: «Scu burgais da San Murezzan d’eira’l fich prezius ed ün inrichimaint. El d’eira fich important per me.»

Ün unicat in tuot ils reguards

Scu giuven bankier ho Carl Adolf Häberli lavuro a Paris e Genevra. Pü tard es el alura turno in sia patria a San Murezzan. Lo ha el vivieu üna vita pütost solitaria e retratta, traunter quatter paraids illa villa «Heb di Fescht» – üna chesa decadenta: üngüna tecnica, traunter 15 e 16 gros, sulettamaing üna maschina da scriver sün maisa ed üna fuolla giazettas e documentaziuns derasedas in tuot la chesa. El d’eira ün messi.

Üna glista multifara descriva a quist originel cun chavels in crusch e travers ed üna barba lungia grischa: «Scheni, excentriker, idealist, filosof, botaniker, chantadur, umorist – ün unicat in tuot ils reguards».

A mincha radunanza cumünela

Carl Adolf Häberli vaiva grand interess per la politica, d’eira adüna fich bain infurmo – ed es sto preschaint a mincha radunanza cumünela. «Suot varia vaiva Carl Adolf Häberli adüna l’ultim pled», ho Christian J. Jenny quinto invers RTR. «Cur cha la glieud gniva plaunet inquieta d’heja alura dit: ‹Sar, Häberli, nu füss que üna tematica cha nus pudessans discuter insembel a l’aperitiv?› Ed el ho alura dit ch’eau hegia radschun e cha nus dessans ir a l’aperitiv.»