Sport

«Da las quatter giadas, sun jau stà be ad ina ceremonia d’avertura»

Dario Cologna fa part da la suprastanza da l’uniun «Switzerland 2038» sco represchentant d’atletas e d’atlets. Sco ch’el ha ditg en l’intervista cun la FMR suenter la conferenza da pressa, saja l’uniun actualmain fatschentada cunzunt cun dumondas strategicas.

Olivia Portmann-Mosca, ils 12 da schaner 2026

FMR: Tge èn actualmain Vossas incumbensas en questa uniun?

Dario Cologna: Actualmain essan nus en la suprastanza da l’uniun «Switzerland 2038» cunzunt occupads cun dumondas strategicas, quai pon ins congualar in zic cun in pensum dad in cussegl d’administraziun. Nus train bleras decisiuns davosvi. Ma tranteren datti era chaussas operativas che nus discutain, sco per exempel dumondas da finanzas u ils lieus d’occurrenza. E sche nus survegnin il 2027 lura propi l’approvaziun da l’IOC, ma poss jau era imaginar da far ina lavur operativa.

Vus essas qua sco represchentant d’atletas e d’atlets, sin tge puncts rendais Vus attent?

I va cunzunt per l’experientscha che jau hai gia fatg durant quels quatter gieus olimpics, nua che jau era da la partida. Là hai jau vis che per exempel vias curtas tranter las differentas localitads èn agreablas per ils atlets. Ma ch’igl è tuttina era flot, sche las occurrenzas pon vegnir visitadas da blera glieud ed in public interessà. Quai è en Svizra segir flot, cunquai che nus essan ina naziun interessada al sport d’enviern.

En Voss concept n’èsi betg previs dad avair ina vischnanca olimpica centrala, mabain che las atletas ed ils atlets stattan decentral en hotels, là nua ch’els han lur concurrenzas. Na uschia betg a perder il spiert olimpic da la cuminanza?

Quai è oramai il futur dals gieus olimpics, sch’ins vul esser persistent. Cunquai che las concurrenzas sportivas dovran tschertas infrastructuras che n’èn betg adina tuttas al medem lieu. E lura na vul ins betg exnum fabritgar entiras citads be per in’occurrenza. I na resta pia nagut auter che da sparpagliar las occurrenzas tenor las infrastructuras existentas. E be per dir, era quest onn èsi magari lungs viadis da Livigno fin a Cortina ed a Milaun. Ed en quel temp arrivain nus era fin a Losanna. Ma jau stoss era dar tiers che da las quatter giadas che jau sun stà a gieus olimpics ha jau pudì ir be ina giada a la ceremonia d’avertura, perquai che nus passlunghists eran uschè dalunsch davent. En Svizra pudain nus perfin porscher a dapli atlets ed atletas l’uschè numnada «olimpic experience».