La scola bilingua sto bandunar il Lachen

Ch’ils uffants e la magistraglia da la scola bilingua a Lachen a Cuira ston bandunar la chasa da scola, quai fa mal il venter a Patric Collet. «Surtut perquai ch’i na dat entant anc nagina soluziun fixa», ha il president da l’Uniun Rumantscha Cuira (URC) ditg envers RTR. Ina sfida vegnia la situaziun ad esser surtut per la magistraglia che vegnia stratga or da ses conturn actual da lavur: «Scolasts e scolastas na creschan betg vi da plantas, da maniera ch’ins als po simplamain racoltar», ha Patric Collet ditg en quest connex. En cas che la magistraglia na veglia betg midar la chasa da scola, possia esser che la scola bilingua da Cuira haja en l’avegnir memia pauc persunal d’instrucziun.

Blers uffants en ils quartiers

Il suprastant da la citad da Cuira e responsabel per las scolas Patrik Degiacomi chapescha ils quitads. «Igl è dentant necessari da spustar la classa bilingua dal Lachen en in auter lieu», ha’l ditg envers RTR ed ha gist declerà il pertge: «En il quartier enturn il Lachen datti numnadamain dapli uffants che dovran plazza en scola.» Vitiers vegnia che las scolas en la vischinanza, quellas da Masans e Montalin, hajan era dapli uffants. «Per part ston quels vegnir tramess en la chasa da scola Lachen.» Pia sto la scola bilingua rumantsch-tudestga tenor Patrik Degiacomi vegnir plazzada «là nua ch’igl ha spazi e betg là nua che la plazza è stgarsa».

Paucas pussaivladads

Sco ch’el ha cuntinuà, ha la citad da Cuira examinà bleras differentas opziuns, resguardond er ils uffants che vegnan ils proxims quatter fin tschintg onns en scola en mintga quartier. «Bleras variantas n’èn dentant gnanc pussaivlas», ha infurmà Patrik Degiacomi, «entant è mo ina soluziun pussaivla sin maisa, quella n’è dentant anc betg dal tut segira.» Quai fiss tenor el la soluziun che la chasa da scola Florentini (en la Ringstrasse) vegniss puspè prendida en funcziun per la scola bilingua. «Questa chasa da scola è numnadamain vegnida prendida ord funcziun perquai che la nova chasa da scola Fortuna è vegnida bajegiada en la vischinanza.»

Il spazi en il Florentini vegniss, sco ch’il responsabel per las scolas da Cuira ha ditg, dentant duvrà era da la scola commerziala u dals pumpiers. Gist pervi da quai è Patric Collet da l’Uniun Rumantscha sceptic. Tenor el duvrassi «ina soluziun a lunga vista per la scola bilingua e betg che questa stoppia adina puspè far midada.» Ina schanza vesa el dentant tar la chasa da scola Florentini, perquai che là fissi, sco ch’el di, plazza avunda per metter ensemen la scola bilingua cun la scolina rumantscha. Ils quitads èn dentant pli gronds: «Sche la magistraglia manca ed i na dat nagin lieu a lunga vista, perda la scola bilingua attractivitad.» Sche geniturs na tramettessan betg pli lur uffants en questas classas, alura temia la URC per l’entira purschida rumantsch-bilingua a Cuira.

Spargnar trais milliuns tar las scolas

Fin cura che las scolaras e scolars pon anc ir a scola en il Lachen n’è anc betg cler. Ina decisiun vegnia a dar suenter che la citad haja schlià la sfida da spargnar. «En il rom d’in pachet da spargn da diesch milliuns francs ston circa trais milliuns francs vegnir spargnads tar la furmaziun», di Patrik Degiacomi: «Jau na sai betg danunder ch’ins pudess striunar natiers quests 3 milliuns.» Mintga partiziun pudess tenor el esser pertutgada, surtut partiziuns che na sajan betg in stuair tenor lescha. «E las scolas bilinguas a Cuira – la rumantscha sco era la taliana – èn purschidas supplementaras», constatescha el.