Lectura Rumantscha

Betg custs, mabain investiziuns

I dat in nov siemi: il siemi «Switzerland 2038», ils emprims gieus olimpics en Svizra dapi 90 onns. E quel siemi custa tenor l’uniun purtadra radund 2,2 milliuns francs inclusiv las lavurs da preparaziun. Da tschantschar da custs saja dentant fauss. I sajan plitost investiziuns, ha ditg la co-presidenta da l’uniun Lenka Kölliker glindesdi a Berna. – Logic, siemis èn adina gratuits. Ma igl è d’investir.

Ils daners èn era decisivs

Tenor tge criteris decidas ti nua e tge cumprar? Jau suppon ch’ils daners gioghian ina rolla decisiva, gist sco quai ch’igl è il cas tar la vischnanca dad Ilanz/Glion. Quella tschertga ina nova varianta per traversar la Val da Riein tranter Pardi e Signina, cun pendiculara, punt u cun omadus. Tge varianta vegn favurisada? Quai dependa dals daners.

Betg ina halla, mabain ina stalla

Tge far cun ina stalla vida? – Da la reutilisar sco chasa da vacanzas è in dals emprims impuls, almain tar agents d’immobiglias. En Valragn ha in’uniun in’autra idea, numnadamain da far or dad ina stalla ina halla da raiver. Sche quai reussescha u betg, dependa dentant … dals daners.

Il curling en il focus

Per la 30avla giada ha lieu il Grond Premi da curling a Scuol. Per Markus Solinger è quai la derniera sco president da l’organisaziun. En l’avegnir ha el damai dapli temp per batter puspè ils concurrents da Sent.