Ün’expertisa dess dar sclerimaint

«Na, i nun exista pel mumaint ingün problem acut per l’implant da sport Trü», quieta il capo da Scuol, Aita Zanetti, sün dumonda da la FMR, «nus lain simplamaing laschar far ün’expertisa per cugnuoscher il stadi da l’indriz d’ammoniac e per savair, scha nus stuvain trar masüras in chosa e lura chenünas.»

In sia ultima sezzüda da la mità da december 2025 ha la suprastanza decis da laschar examinar l’indriz.

Punct da partenza: duos incaps

Dat andit da laschar far üna tala expertisa hajan duos incaps dürant il decuors dals ultims duos ons, ingio cha la chemicalia toxica chi vain dovrada per sfradantar, es culada oura. Ch’eir schi nun existiva, in tuots duos cas, ingün privel immediat per la populaziun, stopcha il cumün tour serius quista fatschenda. Perquai – e per motivs da transparenza – s’haja decis da publichar quist intent i’l riassunt da la sezzüda da december chi’s chatta sülla pagina d’internet dal cumün.

La gestiun da l’implant da Trü, chi’d es in mans da la Bogn Engiadina Scuol SA (BES), nu saja intanta periclitada. Las lingias d’ammoniac sun però ün elemaint central per tuot la gestiun da l’implant da sport – dürant l’inviern e dürant la stà – e douvra perquai eir ün’attenziun speciala.

«Nus fain uossa ün pass davo l’oter, per nu trar conclusiuns sainza avair ponderà bain», cuntinuescha Aita Zanetti. Perquai appellescha il capo da neir brich far ingünas speculaziuns. Cun resultats concrets as faja lura quint dürant il decuors da quist on.

Ed il futur a lunga vista?

Per cas cha l’expertisa pretenda üna sanaziun vi dals indrizs tecnics, saja al cumün bainschi consciaint ch’üna tala chaschuness probabelmaing cuosts considerabels.

«Aint il preventiv curraint nu vaina neir na previs ingünas expensas in connex cun sanaziuns plü grondas pro l’areal da Trü. Scha quai vess dad esser il cas, schi’s stuvessa finalmaing e davo avair fat tuot ils sclerimaints necessaris conceder credits correspundents.»

Pazienza sarà in quist cas la devisa. Quella s’haja adüna darcheu stuvü avair in connex cul svilup da l’areal da sport Trü. Be avant raduond ün mez on ha nempe il cumün, per motivs finanzials, stuvü metter ad acta il proget «Avegnir Infra Scuol». Quel proget cumplessiv vess previs plüssas investiziuns plü grondas ill’infrastructura da sport e da temp liber in cumün, tanter oter eir sün l’areal a Trü.

Che sanaziun chi po gnir realisada e scha insomma, nu dependa dimena be unicamaing dals resultats da l’expertisa tecnica, dimpersè a la fin finala eir dals mezs finanzials dal cumün da Scuol.