Strategia e pliras leschas per 2026
Sco usità mintgamai al cumenzament da l’onn ha la regenza grischuna preschentà ier mardi ses program cun las finamiras per l’onn 2026. Ils puncts centrals èn la realisaziun da la strategia chantunala da persunal e la realisaziun da differents projects da lescha.
Il nov program da la regenza per 2026 cumpiglia 84 finamiras. Il nov president dalla regenza grischuna, Martin Bühler, ha declerà ier mardi a las medias ch’i sa chattian tranter las finamiras pliras tematicas che vegnian numnadas sco puncts centrals. In da quels puncts saja la strategia chantunala da persunal. In auter sajan plirs projects da leschas. Ensemen cun il preventiv per l’onn 2026 ha il Cussegl grond deliberà il december 2025 il program da la regenza.
Patrun attractiv
La finamira da la nova strategia da persunal è tenor il president da la regenza Martin Bühler da procurar per in’administraziun chantunala cun plazzas da lavur da buna qualitad. «L’administraziun duai daventar ina patruna attractiva. Perquai vulain nus realisar enfin l’onn 2028 en plirs etappas posts da lavur persistents e substanzialmain attractivs.» Quest onn vegn introducida la nova strategia da recrutaziun. Ultra da quai saja programmà d’introducir in sistem da valitas communablas e d’in stil da manar communabel, ha declerà Martin Bühler ch’è er il pli aut schef dal persunal chantunal.
Promoziun d’abitaziuns
La Regenza ha mess en vigur a partir dal 1. da schaner 2026 la nova Lescha chantunala davart la promoziun dal spazi d’abitar. Marcus Caduff, il schef dal departament d’economia publica e fatgs socials ha explitgà las finamiras da questa lescha a l’inscunter da medias. Purtaders da chasas d’abitar d’util public possian da nov vegnir promovids pli sistematicamain per construir, renovar u per acquistar abitaziuns affittadas. Quai cun emprests da daners favuraivels. Tenor Marcus Caduff duai la nova lescha cuvrir il basegn d’abitaziuns pajablas e sustegnair la realisaziun da projects per construir abitaziuns.
Rinforzar la furmaziun professiunala
A basa d’analisas cun involver differentas gruppas d’interess vegnan realisadas l’onn 2026 recumandaziuns per las structuras da las purschidas transitoricas e da las scolas professiunalas spezialisadas. Tenor il cusseglier guvernativ Jon Domenic Parolini vegnan era realisads novs models d’instrucziun per las scolas professiunalas spezialisadas. Ed ultra da quai vegnia a dar models e pussaivladads da finanziaziun en il sectur dals manaschis d’emprendissadi e dals curs intermanaschials. En consequenza da las recumandaziuns vegn elavurà l’onn 2027 la strategia per rinforzar la furmaziun professiunala da basa. Plinavant vegn la furmaziun professiunala rinforzada tras ina nova lescha chantunala per la furmaziun professiunala. Quella vegn presumadamain a vegnir tractada dal Cussegl grond en la sessiun d’avrigl 2026.
Traffic plaun è instradà
«La strategia dal traffic plaun è decidida, ussa suonda la realisaziun en plirs pass», ha ditg la cussegliera guvernativa Carmelia Maissen sco manadra dal Departament d’infrastructura, energia e mobilitad. Cun las mesiras duai la mobilitad cun il traffic betg motorisà vegnir promovida en il Grischun. Questa strategia dal traffic plaun è ina da las finamiras impurtantas dal departament Maissen enfin l’onn 2037 sper tuttas dumondas che pertutgan l’avegnir da las ovras idraulicas en il Grischun.
Lescha cunter la violenza a chasa
A la fin finala ha la Regenza era preschentà il project da la lescha chantunala cunter la violenza a chasa. En il center da questa lescha stat tenor il cusseglier guvernativ Marcus Caduff la prevenziun e lavur da sensibilisar. «La lescha duai esser in cler signal che la violenza a chasa ha nagina plazza en nossa societad», ha ditg Caduff. La debatta da questa lescha en il Cussegl grond è previsa la segunda mesadad da l’onn 2026.
Gust da leger dapli?