​Tot resta scu anfignen ossa

Cun la midada digl onn è la suprastanza digl cumegn da Surses er sa radunada per la repartiziun digls tschintg departamaints. Sa retratg siva d’esser sto seis onns commember dalla suprastanza communala è Romeo Poltera da Savognin. Mantganto la reelecziun ò alloura Irene Kolb da Savognin, tg’è stada quatter onns commembra dalla suprastanza digl cumegn da Surses. Tgi la donna è betg ple neida eligeida è stada igl aton passo ena pulita surpresa.

Adrian Ballat resta vicemastral

Schef digl departamaint I, è scu gio igls davos dus onns Daniel Wasescha da Savognin, igl mastral digl cumegn da Surses. El segna per l’administraziun generala ed alloura er per las finanzas e taglias. Sies ulteriours pensums èn igls fatgs digl persunal, l’economia ed er igls fatgs da sanadad cugl Center da Sanadad Savognin SA. Ultra da chegl è Daniel Wasescha er agl timung digl stab directiv communal. El è er igl om tgi represchainta igls interess surcommunals e regiunals.

Adrian Ballat, uriund da Parsonz cun dimora a Savognin resta aglmanc pigls proxims dus onns vicemastral digl cumegn da Surses. El magna igl departamaint V, ed è responsabel per la furmaziun, la scola, el è er schef dalla cultura, digl provedimaint social ed er digl taimp liber e sport. Per el è igl 2026 bagn en punct culminont scu schef dalla scola cun l’avertura dalla scola nova a Savognin. Adrian Ballat è siva da seis onns commember dalla suprastanza communala da Surses.

Gregor Vellacher da Beiva, tg’ò scumanzo igl sies mandat scu suprastant communala avant dus onns, magna scu anfignen ossa igl departamaint II, vot deir igl turissem, l’infrastructura turistica, projects e segna er pigl ambiaint.

Thomas Metzler segna pigls fatgs da construcziun

Michael Klein da Tinizong, tg’è da nov commember dalla suprastanza digl cumegn da Surses, segna per la direcziun digl departamaint IV. El ò da vurdar dalla digitalisaziun, segna pigls fatgs digl traffic, l’agricultura, las alps e las pastgiras inclusiv igls bietgs d’alp. L’economia forestala, igl militer, la protecziun civila totgan er tigl sies departamaint. Ultra da chegl totgan igls fatgs da santieri e sepultura er tigls pensums da Michael Klein. Chel departamaint ò mano igls davos quatter onns Irene Kolb.

Nov schef digl departamaint da construcziun, igl departamaint III, è Thomas Metzler da Savognin. El è da nov commember dalla suprastanza communala da Surses ed è er responsabel pigls projects d’infrastructura communals. Las numerousas immobiglias ed alloura er la planisaziun locala, ena partiziun impurtanta digl departamaint III schean er an sies mangs. Cun sorteir Irene Kolb dalla suprastanza digl cumegn da Surses è chella cumplettamaintg an mangs masculins ed aglmanc per dus onns sieir sainza ena donna. An dus onns vignan an elecziun schinavant tgi candideschan puspe Daniel Wasescha, igl mastral, Adrian Ballat, igl vicemastral e Gregor Vellacher, igl suprastant e manader digl departamaint turissem. Siva digl 2026 è Giani Spinatsch igl nov canzlist digl cumegn da Surses, tgi ramplazza Beat Jenal tg’è sto siva digl 2016 canzlist communal da Surses.