«da nus» – products regiunals veseivels

«La part su dalla Surselva porscha in tschuppel scazis culinaris. Quella varietad e quella rihezia daventa ussa veseivla silla pagina da web danus.ch. Igl emprem pass ei ina cumparsa digitala», scriva Sara Hoch, la meinafatschenta dil Center sursilvan d’agricultura e dil project «da nus» en ina communicaziun als mieds da massa.

Purschida varionta

La plattafuorma dat ina vasta survesta dalla purschida regiunala naven da quella da stizuns da purs entochen ella gastronomia. Aschia el restaurant Otg a Segnas/Cuoz, nua ch’il cuschinier Sven Heller prepara products da producents regiunals. Ni lu era la stizun da vendita a Mutschnengia, l’emprema ch’ei vegnida aviarta ella regiun. Quei che ha entschiet leu sco hobi ei oz ina plazza cun in volumen da lavur da 70 % da Gabi Bundi. «Il truffel ei ina diva che pretenda bia attenziun», vegn Clau ­Deplazes citaus ella communicaziun als mieds da massa. Il giuven pur ella vegliadetgna da 20 onns cultivescha pli che diesch sorts da truffels a Surrein. Denter quellas era sorts pauc enconuschentas, mo che han persuenter dapli gust.

Investa els menaschis

«La purschida dalla Surselva vegn procurada d’interessanta glieud. Quella prepara ils products per che quels sappien vegnir survi sin meisa. Quella purschida presentein nus silla pagina da web ‹da nus› e dein aschia in’investa en differents menaschis», puntueschan ils iniziants dalla purschida nova. Accumpignada vegn quella cumparsa cun historias en medias socialas. «da nus» ei in project parzial dil PRE Cadi. «Quel ha la finamira da presentar ils products regiunals d’aulta qualitad ed aschia d’impedir che quels restien nunenconuschents. Els duein esser veseivels», vegn Roland Cajacob, meinafatschenta dil PRE Cadi citaus ella communicaziun als mieds da massa. PRE vegn susteniu dalla Nova politica regiunala dalla Confederaziun.

Negin certificat

Per la purschida dalla regiun presentada silla plattafuorma «da nus» dat ei negin label. «Nus desistin sapientivamein d’in certificat. Da quels dat ei gia differents sco per exempel Alpinavera. In certificat fuss cumbinaus cun bia lavur administrativa. Leutier stuess vegnir definiu claramein tgei ch’ei regiunal. Nus sefidein dils producents», di Sara Hoch sin damonda dalla FMR. Medemamein eis ei era buca previu d’installar in online shop, pia la pusseivladad da retrer ils products sin empustaziun directamein silla pagina da web. Tenor Sara Hoch fuss era quei cumbinau cun bia lavur e surtut era cun localitads per magasinar ils products. «Lu vegn spert era la damonda dil datum da consum dils products», constatescha ella. Sin fundament dallas informaziuns silla plattafuorma «da nus» sappi la clientella sedrizzar sezza directamein als producents. La gliesta dils producents silla pagina da web duei vegnir cumpletada cun ulteriurs igl avegnir. «Nus patertgein era vid stizuns dil vitg», di Sara Hoch. 

In emprem pass

La nova cumparsa digitala ei igl emprem pass dils iniziants dil Center sursilvan d’agricultura. El decuors da quest onn duein ulteriuras mesiras suandar: arranschaments d’aventura e per interessents dalla reit dallas producentas e dils producents. «Nus lein organisar uonn ina sentupada da producents cun gastronoms. Quella duei vegnir cumpletada cun in referat ed eventualmein era ina discussiun al podi. Ils producents dalla regiun vegnan a saver sepresentar leu cun lur purschida», di Sara Hoch. La finamira ei da far enconuschent ils products e da colligiar ella reit ils differents acturs dalla culinarica regiunala.