Magia dal nouv cumanzamaint?

Cun fö e sacrifizis eschna partits in l’on 2026. – Immez la pirantüm d’inviern ha cumanzà l’on nouv in quist möd. Scha no lain o bricha, la catastrofa da Crans Montana ans tocca: a Turich, dapertout in Svizra e suroura ils cunfins.

Glieud giuvna ha festagià immens, schmasüradamaing. Ella ha giodü la parti – ed il fö consümond till’ha magliada sco üna strasora. Ed uossa sta il temp salda, pleds spiritus – o pleds chi cuffortan nu daja.

Che chi exista es il cordöli, la solidarità, il cumbat dals corps blessats ed eir üna rabgia narra invers tuot ils umans e las structuras chi han permiss chi ha dat our dad üna bella parti da Silvester üna catastrofa. Co es quai be stat pussibel? – Id es capità.

Il temp da cordöli, da suspensiun, da las dumondas sainza resposta, ils cumbats per cuntinuar a viver sun centrals.

Il prüm da tuot per incleger che chi’d es capità. No lain savair a chi cha no vain pers, no eschan trists cun tuot quai chi tocca pro: las larmas, la disperaziun, la rabgia, la forza, chandailas e purtrets.

Plü tard cumanzarà la vita plan planin darcheu a far ün prüm pass. Ils fats restaran per adüna preschaints per quels chi sun pertocs directamaing, ün mumaint sco ün’eternità, ün’amarezza chi mai nu passarà. E cun che cuolpa ston viver ils respunsabels? Ella es simplamaing insupportabla e listess sper eu ch’els tilla possan admetter publicamaing.

No savain co chi va. Ils dis creschan, progets nouvs spettan da gnir realisats, la glieud lavura darcheu, stübgia, fa examens. Uffants naschan, plü gronds cumainzan lur stüdi o imprendan ün manster, il temp va …

Ed uschea riv eu a l’unica roba chi’ns cufforta forsa: «In mincha cumanzamaint abita üna magia chi’ns protegia ed ans güda a viver», disch Hermann Hesse  illa poesia «S-chalins» (Stufen). Quai giavüsch eu a no tuots.