Pedals publics per Glion e contuorn

Flavio Elvedi manegia ch’igl intschess el contuorn dil marcau da Glion fuss ideal per metter a disposiziun velos publics. Velos ch’ins sa activar, duvrar e pagar via ina applicaziun dil telefonin. Gratuit ei il diever enconuschents sut bikesharing buc, la purschida ha denton gia fitgau pei en biars marcaus. Ed ella stat era a disposiziun el marcau da Cuera dapi igl onn 2023. Mooinz senumna il bikesharing da Cuera che noda tenor atgnas indicaziuns dapi l’introducziun gia 132 000 viadis cul velo d’emprest.

Flavio Elvedi fa part dalla cumissiun d’energia dalla vischnaunca dad Ilanz/Glion: «Il success ch’ils velos per in e scadin han a Cuera ha intimau la cumissiun d’energia dad Ilanz/Glion da sefatschentar cun quella damonda.» El fa attent alla retscherca online lantschada via la pagina dalla vischnaunca che vul endriescher sch’enzatgi s’interesseschi insumma per bikesharing en vischnaunca.

Analog al sistem da Cuera

Priu il cass che bikesharing vegn insumma introducius ad Ilanz/Glion lu tenor ils sistem secumprovaus a Cuera, gi Flavio Elvedi. «En singuls loghens vegnan ils velos deponi e leu vegnan las batterias dils e-velos cargadas.» Tenor las explicaziuns dil commember dalla cumissiun d’energia eis ei pusseivel da retrer in velo en in liug e schar anavos el en in auter depot. «Igl ei buca pusseivel da schar anavos il velo gest leu nua ch’ins drova buc el pli.» Quei sistem ha caschunau dabia problems en divers marcaus e schizun frenau il bikesharing. Installar in liug da deponer e cargar ils velos cuosta denton tenor il diember da velos denter 10 000 e 15 000 francs.

Flavio Elvedi gi ch’ins enqueri instituziuns ed interpresas che realiseschien sezzas in depot da velos: «En damonda vegnan per exempel centers da cumpra ni eventualmein era il spital regiunal.» Il  commember dalla cumissiun d’energia manegia che quella investiziun per in depot da velos pudess senz’auter esser interessanta per las interpresas. «Emploiadas ed emploiai dallas interpresas che realiseschan in depot retscheivan ina abonnament che lubescha da duvrar ils velos gratuit.»

Interess per ils velos da cargar

La retscherca lantschada dalla cumissiun d’energia dalla vischnaunca dad Ilanz/Glion vegn tgirada da Gudrun Ziermann. Ella fa medemamein part alla cumissiun d’energia e fa stem dad in pulit interess per il velo public. Gudrun Ziermann fa persenn che l’idea da metter a disposiziun aschinumnai velos da cargar anfli dabia cunsentiment. «Cun quels velos selai transportar ina certa bagascha.»  Ella tradescha ch’ei hagi era dau damondas. «Per exempel tgi che tgiri ils velos.» Cun in’autra damonda sto la cumissiun enzacu era sefatschentar. Numnadamein sch’ils depots da velos selain realisar ellas fracziuns che sesanflan sur il funs dalla val. «Ei setracta bein da velos cun tracziun electrica, sch’enzatgi drova denton in tal velo per far il viadi dil cuolm siado ei tschella damonda.» Secapescha che la vischnaunca sezza sa era realisar depots per ils velos per exempel ella vischinonza dil bogn Fontanivas.

Ils suprastont communal e president dalla cumissiun d’energia, Hanspeter Bundi ei pertscharts ch’ei vegni buc ad esser sempel da perschuader il parlament communal d’investir en depots da velos publics. Quei ha el getg sin damonda dalla FMR. Flavio Elvedi che sefatschenta en incumbensa professiunala tiegl Uffeci d’energia e traffic dil cantun Grischun cun damondas dil traffic public gi ch’il velo public seigi era in tema en auters loghens el cantun Grischun. Teoreticamein fuss ei senz’auter pusseivel da prender in velo public a Cuera e deponer e pagar el a Glion. Gudrun Ziermann ei pertscharta che la cumissiun d’energia stoppi aunc sclarir ina ni l’autra damonda: «Forsa savein nus entscheiver inaga cun ina mudesta purschida.»