Lectura Rumantscha

84 propiests

In u dus propiests ad onn bastan, u betg? – Na, almain tar il Chantun betg. La regenza grischuna ha numnadamain proponì gist 84 finamiras per l’onn 2026. E quai munta era per il nov president da la Regenza Martin Bühler blera lavur. Ses emprim onn en quest uffizi sco er ils 84 propiests affrunta el dentant era cun umor, sco ch’igl è sa mussà en l’intervista cun la FMR.

660 kilos

I tutga in pau tar la categoria «savida inutila» – il battagl rut dal zain grond da la baselgia parochiala s. Gions a Mustér pasava tranter 80 e 100 kilos. Impressiunant è quai fatg tuttina. Cunzunt sch’ins s’imaginescha ch’ina rotscha da giuvens e vegls ha tratg l’entir zain l’onn 1916 da la staziun tar il clutger. E pir tge sforz, sche quest zain fiss anc stà pli grond? Tar in zain propi grond avess numnadamain gia il battagl pasà radund 660 kilos!

67 fugitivs

Iran, Irac, Afganistan, Ucraina, Venezuela, Columbia, Tirchia, China … ils 67 fugitivs e fugitivas che vivan en il center d’asil a Marmorera derivan dals pli differents pajais. Per pudair render pli agreabel lur dimora en il Surses po la populaziun s’engaschar a basa voluntara e porscher activitads per il temps liber. Ad ina saira d’infurmaziun è vegnida proponida tranter auter ina schlittada sin l’Alp Flex u in suentermezdi da gieus.

A revair e bun divertiment cun la Lectura Rumantscha!