Fiasta mundiala sil Crap Sogn Gion
La gronda concurrenza da freestyle e snowboard, il Laax Open, fa part dalla cuppa mundiala. La davosa fin d’jamna han mellis e mellis mirau las cuorsas da qualificaziun ed il final ella mesapipa ed el parc da siglir ellas disciplinas snowboard e freeski.
In meins avon ils Giugs olimpics a Cortina d’Ampezzo han las atletas ed ils atlets digl entir mund giu la davosa schanza da sequalificar per quels. Il Laax Open 2026 ha attratg mellis fans sil Crap Sogn Gion.
La Chinesa Eileen Gu ed il Norveges Birk Ruud
Ina emprema decisiun pils tetels da campiuns ei stada la sonda avonmiezgi ella disciplina sigliera. Tier las dunnas ha la Chinesa Eileen Gu e tiels umens il Norveges Birk Ruud gudignau e cunquei segirau il tetel. Omisdus han repetiu la victoria digl onn vargau. Per Birk Ruud eis ei la tiarza victoria en seria al Laax Open. Eileen Gu ei semessa claramein, cun 85,13 puncts, sisum la gliesta da rangaziun, quei cun in segl numnaus «Left Double Cork 1080 Blunt».
Eileen Gu ha festivau sia 20avla victoria en ina cuppa mundiala. Ei seigi in record ella historia dil sport da freeski, scrivan ils organisaturs da Laax Open en lur communicaziun. Il secund plaz ha l’Americana Marin Hamill contonschiu, l’Austriaca Lara Wolf ei vegnida tiarza e la Svizra Mathilde Gremaud ei vegnida siatavla.
Tiels umens ei Birk Ruud il herox dil Laax Open 2026. Cun ina cuorsa schubra, denter auter cun in «Switch Left Double Cork 1620 Blunt» ha el dumignau la concurrenza, quei cun 85.08 puncts. Gl’Australian Matej Svancer ed il Canades Evan McEachran ein vegni secund e tierz. Andri Ragettli ha stuiu secuntentar cul rang siat e Nils Rhyner che habitescha a Laax ei vegnius 12avel.
Gaon Choi e Scotty James
Al final dalla sonda sera ella mesapipa han, avon ina culissa da mellis aspectaturas ed aspectaturs, la Coreana Gaon Choi e gl’Australian Scotty James dominau. En in’emissiun directa dil Crap Sogn Gion han milliuns carstgauns digl entir mund mirau la decisiun dils umens e dallas dunnas al Laax Open 2026. Scotty James ha gudignau la sisavla gada alla cuppa mundiala a Laax. Impressiunau hagi cunzun siu schinumnau «Switch Backside Double Cork 1440 Mute», scrivan ils organisaturs. Igl ei la secunda gada insumma ch’igl ei gartegiau ad in atlet da mussar ina schubra setschentada cun quei segl. Ils plazs sil podest han cumplettau Campbell Ives Melville dalla Nova Zelanda e gl’Australian Valentino Guseli. Gaon Choi ha perschuadiu perencunter cun in ferm «Backside 900 Stalefish» sco era in «Frontside 1080 Melon». La concurrenza ha buca giu schanzas encunter ella. Ils plazs dus e treis han la Giappunesa Rise Kudo e la Chinesa Cai Xuetong.
Gust da leger dapli?