80 onns Merz cun trais generaziuns

«Il scopo da nossa lavur è da render ventiraivels noss giasts e nossa clientella.» Quest citat è da chattar sin la pagina d’internet da l’affar Merz che festivescha quest onn ses 80avel onn d’existenza. Il Café Merz cun la butia da paun e da confisaria è ina marca grischuna che bleras e blers enconuschan dapi lur uffanza.

Diesch lieus d’affar

L’onn 1946 han Marie e Walter Merz avert en la Gürtelstrasse sut la staziun da Cuira lur emprima pasternaria-conditoria cun in café. Perquai che las localitads na purschevan betg avunda plazza pli han ils consorts decidì da midar domicil. Els èn sa chasads il 1953 a la Via da la staziun 20 a Cuira. L’onn 1974 han il figl Hanspeter Merz e sia dunna Barla surpiglià la fatschenta che aveva gia da quel temp 38 collavuraturas e collavuraturs. E dapi 20 onns è la terza generaziun, oz cun ils fragliuns Sabrina Fry-Merz, Seraina Merz e Roni Merz, possessura e gestiunaria da l’interpresa cun passa 200 collavuraturas e collavuraturs.

La gastronomia e pasternaria-confisaria Merz è sper il Maron a Cuira in lieu d’identificaziun per bleras e blers Grischuns. Oz gestiunescha la famiglia Merz diesch butias e cafés a Cuira e davent da Buchs enfin Panaduz. E da nov è era la conditoria Schneider a Tavau en possess da Merz. Il parsura da la direcziun Roni Merz di che l’affar haja ussa cuntanschì pli u main ina grondezza ideala.

«Il recept è noss bun persunal»

Durant il discurs cun la FMR ha Roni Merz menziunà pliras giadas ses bun persunal, il qual saja il motiv per la buna existenza da l’interpresa. «Nus avain bleras excellentas collavuraturas e collavuraturs ch’èn era pronts da collavurar vi da novas ideas e da gidar a sviluppar projects novs», di el. Numerusas persunas sajan en viadi cun el gia dapi blers onns.

Il segund aspect per avair success èn tenor Roni Merz las midadas che na sajan betg adina visiblas per la glieud d’ordaifer. «Blera glieud n’ha per exempel betg chapì cur che nus avain serrà noss café-restaurant a la Via da la staziun en l’emprima auzada e midà en il plaunterren. Per nus è quai stà ina mesira anticipada perquai che nus avain vesì en tge direcziun che la gastronomia sa sviluppescha. Damai: Success pon ins avair, sch’ins agescha intgins onns avant che tschertas chaussas daventan realitad.»

Sco terz factur numna il proprietari e directur il plaschair e l’engaschi per la lavur da mintga di. Merz producescha 365 dis l’onn durant 24 uras per di. «Per nus tuttas e tuts è nossa lavur ina tenuta che pretenda era lavur irregulara, tranter auter era per pudair reagir a tscherts svilups.»

La famiglia è il center

«Dapi che mia tatta ch’è stada la patruna dal manaschi da lezzas uras e mes tat han fundà la fatschenta Merz è la famiglia adina stada il center da la pasternaria, confisaria e dal café-restaurant.» Pli fitg che l’affar saja creschì e pli fitg che l’influenza da las singulas persunas saja sa diminuida, declera Roni Merz. «Noss model dal manaschi da famiglia n’è dentant betg in model antiquà. Quest model è innegoziabel. Nus vivain simplamain in pau auter quest model da famiglia.» La proprietad saja e restia per 100 % en famiglia, di Roni Merz. En pasternaria, en las butias ed en la gastronomia saja mintgina e mintgin dals collavuraturs ina part da la famiglia. «Questa cultura d’interpresa famigliara avain nus cuntanschì tranter auter cun stgaffir passa 30 partiziuns che lavuran e portan enavant nossa filosofia.»

Damain pasternarias

Roni Merz di che ses bab raquintia ch’i deva anc il cumenzament dals onns 1970 circa 25 pasternarias cun producziun classica en la citad da Cuira. Oz sajan quai be fitg paucas pli che possian exister sper ils distribuiders gronds cun lur industria da paun e products da pasternaria e conditoria. «Jau sun fitg led che l’Uniun svizra da maisters pasterners ha prendì ina posiziun clera cura che l’istorgia dal paun per in franc dals distribuiders gronds è vegnida en discussiun. L’uniun ha ditg cler e net: In paun da buna qualitad persistenta che cuntegna tuttas materias primas e che vegn fatg da collavuraturas e collavuraturs ch’èn pajads en urden custa simplamain quatter empè da be in franc.» Sia opiniun è dentant ch’ils distribuiders gronds na sajan betg la culpa da la muria da las pasternarias. Els sajan simplamain in dals motivs per quest svilup. La raschun saja da chattar tar l’economia dal martgà liber.

Nagins plans actuals

«Mias soras ed jau sco proprietaris da l’affar Merz sco era noss partenaris da cader en la operativa stain oz amez il temp da nossa vita professiunala», respunda Roni Merz a la dumonda dals plans futurs per sia interpresa. «Jau hai adina gì in pau respect da vegnir en la situaziun da star eri e laschar esser bun sco ch’igl è. Quai po esser il cumenzament da la fin. Nus vivain dentant en in mund cun midadas fitg andetgas. Tenor mai fissi fauss da far en quella situaziun plans da diesch onns ubain dapli.» Il davos pass saja stà quel da cumprar la conditoria e pasternaria Schneider a Tavau. «Il settember 2025 hai jau udì che quel manaschi saja venal ed il december avain nus surprendì il manaschi. Il mund è daventà fitg volatil, er en nossa branscha.»

A la dumonda co che l’interpresa Merz vegnia a sa preschentar cun 100 onns ha Roni Merz respundì cun trais variantas: L’emprima varianta è che Merz ha chattà ina soluziun per la successiun ed ha novs possessurs. «La segunda varianta è quella d’ina successiun da l’atgna famiglia. Sch’insatgi dals giuvens ha gust da cuntinuar, lura vegni a dar ina quarta generaziun Merz. E la terza varianta è quella ch’i na dat insumma nagina successiun e lura èsi finì.»