Dad Eminem tochen Adele
Las scolas da talents da Tavau, Cuera e Glion ei sepresentadas dacuort a Glion cun ina producziun communabla. Ina gruppa che absolva la partiziun da musica ha concertau.
A Glion frequentan siat giuvnas la scola da talents ella partiziun da musica. Era a Cuera ed a Tavaus absolvan divers giuvenils il scalem superiur en quella partiziun. Regularmein organiseschan ils scolasts da tuttas treis scolas camps d’exercezis communabels che fineschan cun in concert. In tal concert ei staus dacuort a Glion. Suenter il davos ch’ei staus l’entschatta zercladur 2025 han ils scolasts Michel Estermann, Andri Arpagaus ed Achille Salvi organisau in’jamna da project per in concert communabel. Cuort avon ch’igl emprem semester digl onn da scola 2025/26 fineschi han ils 20 giuvenils – la gronda maioritad ein giuvnas – exercitau in program.
Hits da rock e hip hop
En mo treis gis han els empriu in repertori da 16 canzuns e songs. Buca mo il cantar ed il sunar ils instruments, era l’accustica cun amplificaturs, scenografia ed andament dil program han ellas stuiu trenar. Las siat giuvnas dalla Surselva, ensemen cullas cameratas dallas scolas da Tavau e Cuera, ein sepresentadas ell’aula dalla casa da scola. Suenter in’entschatta culla canzun a cappella «Ave Maria» da Carli Scherrer, ei il stil da musica semidaus. Persulas, en duets ni formaziuns pli grondas han ellas interpretau songs en engles da rock, pop, hip hop ed auters stils. Aschia ha gl’auditori gudiu «Monday Morning» da Melanie Fiona, in song da 2009. Las giuvnas han era interpretau detg perschuadent «Set fire to the rain» dad Adele.
«Forever young»
Ins ha bein s’encurschiu ch’ellas han buca giu bia peda da trenar. Malgrad la nervusadad e la concentraziun han ins era viu fatschas rientas ed udiu vuschs fermas. La tecnica da glisch ed accustica che ha funcziunau perfetgamein ha accentuau il concert. Dalla band Coldplay han ellas cantau «Viva la vida», accumpignadas dallas cameratas che han sunau. «Forever young», il renomau hit che Bob Dylan ha cantau l’emprema gada 1974 ha animau da sblatschar, tuttina sco il duet da hip hop «I love the way» che Eminem e Rihanna han presentau avon 16 onns l’emprema gada.
Buca playback mobein live
Las giuvnas che absolvan la partiziun da musica dallas treis scolas da talent han mussau ch’ellas ein motivadas. Cantar, sunar e semover sin tribuna avon publicum plai ad ellas ed in concert avon publicum s’auda tiels pensums. Cun bravura han ellas adempliu quei ell’aula a Glion. Buca playback, mobein live e culs pli differents instruments, gegia, ghitarra, cornet, batteria, clavazin, accordeon e clarinetta.
Gust da leger dapli?