Minschuns ha sisti sia festa da giubileum

Quista fin d’eivna vaiva il territori da skis da Minschuns in Val Müstair insè planisà da far festa per seis giubileum da 50 ons. Previs d’eira ün program festiv sur trais dis, tanter oter cun cuorsas da plausch culs anteriurs sportists jauers prominents Dario Cologna ed Urs Imboden. In pleds festivs vessan eir gratulà il president da la regenza grischuna, Martin Bühler, e la presidenta cumünala Gabriella Binkert Becchetti. La festa da giubileum cun bler program da trategnimaint musical vess gnü lö dals dals 23 als 26 schner 2026. 

Ma causa ün mortori han il cussagl d’administraziun dals Implants da sport SA Val Müstair ed il Cumün da Val Müstair decis da spostar las festivitats sün ün oter termin. Quai ha la Implants da sport SA fat a savair in üna comunicaziun als mezs da massa. Ün confamigliar da la famiglia chi’d es statta dürant ils ultims decennis ferm activa illa gestiun dal territori da skis es nempe mort l’eivna passada davo cuorta e greiva malatia.

Spettar e sperar sün prossem pass da svilup

Il territori da skis Minschuns sur la fracziun da Tschierv es gnü lantschà avant 50 ons. Cun seis duos runals plü lungs e cun duos plü cuorts tocca Minschuns plütost illa categoria da las regiuns da skis plü pitschnas. Daspö var desch ons es in discussiun ün prossem pass da svilup per ingrondir il territori da sport d’inviern. Tanter oter as lessa realisar ün nouv indriz d’innaiver, ün ressort cun vers 200 lets ed ün nouv access da pendiculara sü da Tschierv. Però quels pass da svilup sun intant amo miss sün glatsch causa recuors, cuntaisas giuridicas e resalvas ecologicas.  

Quist on ha il territori da skis da Minschuns da cumbatter cun paca naiv e nun ha insè amo pudü drivir dal tuot. Impustüt ils duos runals principals sun restats serrats in quista stagiun. Be il restorant ed ils duos runals pitschens sun stats o sun uossa in funcziun, sco cha la Implants da sport SA Val Müstair ha fat a savair. Invezza da la sporta sün pista prouva l’impraisa d’offrir diversas alternativas da sport d’inviern. Causa quista situaziun precara cun la naiv spera e spetta la Implant da sport SA Val Müstair da pudair realisar bainbod ils nouvs indrizs da far naiv, sco ch’ella ha fat a savair principi da schner sün dumonda da la Posta Ladina.