Scrit da participaziun pitga record
Passa 1900 francs custa l’aczia da la Banca Chantunala Grischuna, tant sco anc mai. Il curs da l’aczia – u meglier ditg dal scrit da participaziun – ha gia l’emna passada rut ses record. Tge munta quai per il Chantun? E fissi prudent d’acquistar ina tala aczia?
«Gea, il scrit da participaziun da la Banca Chantunala Grischuna è sin in’autezza anc mai cuntanschida», conferma il pledader da la banca Thomas Müller. L’entschatta da l’emna passada ha il curs pitgà cun 1890 francs il record dal schaner 2016. «Avant vaira exact diesch onns èn ils scrits da participaziun stads tar 1851 francs», di il pledader.
Ma davart il daco e dacum da quest sgol en autezzas mai s’udidas na vul il pledader betg s’exprimer: «Nus na commentain betg il curs da noss scrits da participaziun.» En il fratemp è il record da l’emna passada gia puspè café fraid. Il mardi ha il scrit da participaziun strivlà la valur da 1960 francs.
Records èn normals a la bursa
Damian Gliott na sa smirveglia betg. «Per il mument èsi uschia ch’ils curs a la bursa creschan en princip en l’entir mund, perquai che l’economia gudogna dapli daners», di il co-fundatur da VermögensPartner. «I n’è era nagut spezial ch’i dat adina novs stans maximals da curs d’aczias, pertge las fatschentas gudognan er adina dapli.» La Banca Chantunala Grischuna demussia bunas cifras, perquai creschia er il curs.
Las aczias da bleras autras bancas èn medemamain creschidas brav entaifer l’onn passà. Damian Gliott relativescha in pau quests auts curs: «Blers han il sentiment che sch’il curs d’ina aczia è aut, lura è l’aczia chara. Quai n’è dentant betg uschia.» Tut tenor quant bain ch’ina fatschenta gudognia, possia in’aczia schizunt esser favuraivla, era sch’ella custia bler.
Ensi u engiu?
A la dumonda, sch’il curs dals scrits da participaziun creschia vinavant u sch’el croda, respunda Damian Gliott: «Savair ordavant sch’i dat ina correctura dal curs u betg, gliez na sa nagin.» Tgi che cumpria aczias, stoppia en mintga cas viver cun svaris ed avair almain diesch onns temp. Lura sajan aczias per il solit segiras.
Ed a la dumonda, sch’el cussegliass da cumprar in scrit da participaziun da la Banca Chantunala Grischuna, respunda el cler e net: «Be singulas aczias na duess ins mai cumprar.» I dovria in portfolio d’almain 50 fin 70 aczias en differentas spartas e differents pajais.
Sch’il scrit da participaziun da la banca sa chattass en in tal vast portfolio, al giuditgass Damian Gliott bunamain per plitost char cumpareglià cun il svilup da las fatschentas da la banca. El sutlingescha però che quest scrit da participaziun na funcziuneschia betg sco autras aczias sin il martgà liber (guarda era box). «Blers cumpran il scrit da participaziun da la Banca Chantunala Grischuna, salvan el e dattan schizunt vinavant el a la proxima generaziun.»
Betg mo questa attaschadadad è la raschun ch’il scrit da participaziun n’è betg suttapost tant a svaris da la bursa, mabain er il fatg ch’il Chantun è facticamain il proprietari da la banca. Tge di lez dals records? Igl è plitost ina reacziun temprada.
Reacziun temprada
Il stan actual dal curs reflecteschia il solid svilup dals affars da la banca e sia rendita solida, scriva Seraina Hostettler, pledadra dal departament da finanzas sin dumonda da la FMR. «Per il chantun Grischun sco proprietari stat en quel reguard damain il curs a curt termin en il center.» Pli impurtants sajan il svilup persistent e la stabilitad da la banca che duain a lunga vista contribuir al svilup economic dal Chantun.
«Il svilup dal curs è plinavant da metter en connex cun il svilup positiv general dal martgà d’aczias», hai num tar il Chantun. Er il SMI ed il SPI sajan progredids. L’autezza dals scrits da participaziun saja perquai da vesair en quest context.
Passa 500 milliuns – betg liquids
Il pli aut curs rinforzia era l’agen chapital dal Chantun, scriva la pledadra. A medem temp stoppian ins resguardar, ch’i sa tractia da valurs cudeschadas – provisoricas e betg realisadas – che n’influenzeschian betg la liquiditad dal Chantun.
356 562 scrits da participaziun da la Banca Chantunala Grischuna posseda il Chantun. Quai correspundia a 14,3 % dal chapital dals scrits da participaziun. En pli è il Chantun participà cun 70 % al chapital da dotaziun. Tut en tut correspunda quai ad ina participaziun dad 84,3 %.
Questa participaziun haja gì la fin dal 2025 ina valur cudeschada provisorica da radund 511 milliuns francs, hai num tar il departament da finanzas. La valur vegnia calculada cun ina media annuala dal curs e cun ina reducziun da 20 % per resguardar la liquiditad limitada. Ils scrits da participaziun na possian en in cas d’urgenza gea betg vegnir vendids immediat.
Dessert e dividenda
In scrit da participaziun da la Banca Chantunala Grischuna pon ins cumprar a la bursa – precis sco in’aczia dad autras interpresas u bancas. Tge è pia la differenza tranter in’aczia ed in scrit da participaziun? In scrit da participaziun dat il dretg da participar al gudogn d’ina interpresa. Il possessur u la possessura survegn ina dividenda. En quel reguard na datti nagina differenza tranter aczia e scrit da participaziun. In auter dretg n’exista però betg. In’acziunaria ha il dretg da vuschar a chaschun da la radunanza generala d’ina societad d’aczias. In proprietari d’in scrit da participaziun na dastga betg cundecider.
Ina dultscha consolaziun datti dentant per il proprietari u la proprietaria d’in scrit da participaziun da la Banca Chantunala Grischuna: Sch’el u ella va a la radunanza generala, datti in bel gentar gratuit inclus in dessert – sper la dividenda usitada.
Gust da leger dapli?