Che vala dürant ils gös olimpics?
Dals 6 fin als 22 favrer han lö ils Gös olimpics d’inviern Milano Cortina 2026. Pervi da las concurrenzas a Livigno han ils gös dürant quel temp consequenzas pel trafic in Engiadina.
Dürant las duos eivnas dals Gös olimpics d’inviern Milano Cortina 2026 dals 6 fin als 22 favrer esa da far quint cun daplü trafic süllas vias grischunas. Quia üna survista pel trafic individual e pel trafic public illa regiun.
Chi das-cha ütilisar il Tunnel Munt la Schera?
Pellas duos eivnas dürant ils gös valan restricziuns pel trafic individual da e vers Livigno. Uschea es il Tunnel Munt la Schera cun be ün vial da las Ouvras electricas Engiadina SA plü o main serrà pel trafic privat.
Ils bus da shuttle dal trafic public han la prüma priorità per passar tras il tunnel, seguits dals veiculs olimpics accreditats, cunfinaris e pendularias cun ün permiss correspundent e giasts cun reservaziuns valablas in allogiamaints a Livigno. Tuot ils veiculs in direcziun da Livigno vegnan fermats illa zona da spetta Champsech ed ordinats e manats tenor la priorità dal transit tras il tunnel.
Ingio as poja parcar per ir a guardar ils gös?
A Landquart dess ün prüm post da park & ride manar als giasts dals gös süls trens da la Viafier retica (VR). Per quel intent daja pro’l parcadi da la staziun e dal Fashion Outlet 140 plazzas da parcar supplementaras. A partir dals posts da park & ride Zernez Nord (1030 plazzas da parcar), Zernez Süd (410) e Müstair (630) viagian bus da shuttle publics da l’AutoDaPosta e dad oters offerents a Livigno ed inavo. Implü daja a S-chanf ün parcadi culla pussibiltà da guinchir cun 150 plazzas da parcar.
Quant cuostan ils parcadis?
Ils parcadis da park & ride a Zernez e Müstair cuostan 70 francs per veicul e di, quels a Landquart raduond la mità.
Co guarda oura cul trafic public?
La SBB e la VR han annunzchà dad augmentar l’urari dal tren. Ils bus da shuttle publics a partir da Zernez e da Müstair as poja eir dovrar sco normalas colliaziuns dal trafic public, quai sainza bigliets d’entrada a las concurrenzas olimpicas.
Chi douvra tuot üna vignetta da transit?
Per tuot las automobilistas e tuot ils automobilists chi sun in viadi sün las vias da transit e d’access tanter Landquart, Zernez e la Val Müstair, ma eir sülla Via d’Engiadina H27 tanter l’Engiadina Bassa e l’Engiadin’Ota e sülla Via dal Pass dal Fuorn H28c vain missa a disposiziun la «vignetta da transit Grischun». Quella po gnir telechargiada gratuitamaing sur www.gr.ch/olympia2026 e stampada. Quista vignetta i’l format A4 simplifichescha il passagi pro’ls posts da controlla süllas vias manzunadas. Ella nun autorisescha però da passar tras il tunnel a Livigno.
Gust da leger dapli?