Chor Surselva e Chor ESMC Canada

«Cheutras presentein nus a vus inagada in project extraordinari. Igl ei in che porta nus sco cuminonza e formaziun da chor sur ils cunfins svizzers. Ei duei esser in exempel che musica colligia carstgauns», scriva il Chor Surselva ella communicaziun ch’el ha publicau dacuort. Il chor mischedau regiunal ha lantschau in project en duas parts che finescha cun in concert ad Ottawa, la capitala dil Canada.

Fundau 1980

Canada ei, suenter la Russia, la secund-gronda tiara dil mund. Ella cumpeglia ina surfatscha da bunamein diesch milliuns km2. La cefra 10’000’000 ei tut in’autra che quella dalla pintga Svizra cun ses 42’000 km2. Era ord vesta dalla spessezia da habitonts ein las tiaras buca da cumparegliar. Silla surfatscha giganta da Canada vivan 40 milliuns carstgauns e sin quella dalla pintga Svizra 10 milliuns. Per Svizras e Svizzers s’auda Canada tier las tiaras preferidas d’emigraziun. Nundumbreivels emigrants vivan ellas diesch provinzas. Ina da quellas ei Alberta. Era en quella numerus Svizzers. Gl’onn 1980 ha in triep da quels fundau ella capital Edmonton in chor viril, igl Edmonton Swiss Men’s Choir (ESMC). La mesadad dils 30 commembers che contan oz en quei chor ein Svizzers d’emprema ni da secunda generaziun.

Igl ESMC sin turnea svizra

Finamira digl ESMC eis ei da cultivar, sco ella patria, la tradiziun da cantar en cuminonza. Igl ei dil reminent mo in da numerus chors svizzers ch’ei dat ell’America dil nord. Quels ein s’alliai ella North American Swiss Singing Alliance (NASSA). Tuttina sco en lur tiara d’origin organisescha quell’uniun tetgala regularmein fiastas da cant. Igl onn 2024 ei la 44avla fiasta a Pittsburgh stada el stadi american Pennsylvania. Era igl ESMC dad Edmonton/Canada ha hospitau pliras gadas quella scuntrada culturala. Il chor svizzer dalla provinzia Alberta separticipescha denton era regularmein a fiastas da cant e turneas ella patria.

Ina tala ha igl ESMC planisau dils 2 tochen ils 16 da zercladur 2026. Sil program dalla viseta ella patria ein tschun concerts, numnadamein a Glion, Gorduno, Düdingen, Engelburg e Wallisellen. Igl ei mintga gada concerts communabels cun chors locals.

Cunterviseta il 2026 ad Ottawa

A Glion coopereschan ils Svizzers-Canades cul Chor Surselva. Quei chor mischedau regiunal envida actualmein in e scadin da separticipar al project da concert. «Nus vegnin a cantar canzuns popularas svizras, en tudestg e romontsch», scriva il Chor Surselva en sia publicaziun. Il concert a Glion ei l’emprema da duas parts dil project cul num «Viseta sur cunfins 2026/27». Suenter il concert en Surselva duei la secunda part dil project suandar, numnadamein la cunterviseta el Canada. La 45avla fiasta da cant dalla NASSA ei digl 1. tochen ils 4 da fenadur 2027 ella capitala canadesa Ottawa. Quell’occurrenza vul il Chor Surselva visitar e render honur agl Edmonton Swiss Men’s Choir che vegn uonn a Glion.

L’emprema part dil project 2026 includa otg emprovas ed il concert communabel cugl ESMC. Quellas ein fixadas mintgamai silla dumengia sera. L’emprema ei ils 8 da fevrer 2026 a Glion ella sala dalla pleiv catolica. Il concert communabel ei da Sontgilcrest, gievgia, ils 4 da zercladur 2026 ella baselgia claustrala dallas soras dominicanas da Glion. «Quei project porscha la pusseivladad d’emprender d’enconuscher e da tgirar ils contacts sur cunfins, el sa denton era inspirar vicendeivlamein», scrivan las persunas responsablas dil Chor Surselva. Rest G. Tuor, dapi varga 30 onns dirigent dil chor, ei era il menader musical da quei project.