Craps, crappa ni greppa

Nossa habitaziun ad Andiast ei biala, emperneivla e cumadeivla – e perinaga san ins aunc adina entrar e sortir senza problems. Gie, igl entrar senza problems s’entelli buca da sesez tier nus! Mo pertgei pomai buc? Pervia dalla scala sper la casa ch’ei en mal stadi?

Na, ei dat aunc in’autra raschun: Jeu rimnel crappa. Cu jeu tuornel dad ina tura – e quei ei savens il cass – meinel jeu adina in crap (silmeins). Jeu hai ferton ina massa crappa: 53, na, 54 craps gagls, 33 craps cun sdremas, 15 craps tarlischonts sco cristallas, 41 (ni 42?) craps cantunus e 67 craps rodunds, 9 craps cun fossilia lien (da quals datti biars entuorn la Camona Durschin), crappa pintga en mantuns – ed aschia vinavon. E lu, tgei far cun tut mes scazis?

Certa crappa ha cletg e po vegnir exponida ella habitaziun: ils craps ils pli bials ed apartis ed ils pli pigns: ella cuschina per exempel, el zuler ni el tschaler. Mo tut l’autra, vul dir in tschuat, sto restar avon ils eschs-casa (per cletg havein nus dus …). Also vegnin miu um ed jeu in di a stuer sedecider sche nus lessen restar permanentamein ella habitaziun (e schar furnir la vivonda cun helicopter) ni star dado, perquei ch’igl entrar ed il sortir vegnan ad esser memia cumplicai per nus ch’essan gia in tec avanzai els onns.

Jeu hai pia bugen crappa – ed era expressiuns cun «crap» e «grep». Da quellas datti numnadamein in grond diember: sco crap marsch, crap spungia, crap scalegl, crap da caltschina ni sablun, carpel, selisch, boller, botscha, carpun, grep, greppatsch, greppam, greppun …! Ed jeu sun sco ei para suorda sco la crappa, perquei ch’jeu cuntinueschel da rimnar crappa, enstagl da far stem da quei che mes amitgs e mias amitgas din. Dapi onns admoneschan els mei che quella situaziun vegni a finir mal. Clar, jeu sun schon cunscienta ch’ei han raschun – jeu sun buca tuppa sco la crappa. Mo jeu pitess da far bargir la crappa sch’jeu stuess dismetter mia bellezia collecziun.

Atgnamein stuess ins metter a disposiziun ina casa cheu ad Andiast a mi, cu mia habitaziun vegn in di ad esser pleina da crappa! Pertgei? Per engraziar a mi per miu survetsch voluntar sco rimnadra da crappa ellas pastiras, egl uaul ed ellas muntognas si sur Andiast, neve? – Ina ­casa-crap nua ch’jeu sai ­vegnir veglia sco la crappa. Ni silmeins stuess ins dedicar a mi in crap da fossa commemorativ …

Johanna Krapf è lectora ed autura e viva e lavura a Rapperswil ed Andiast. Ella ha emprais sursilvan e sa ­fatschenta intensivamain cun quella lingua.