Fundaziun da Puntraschigna ho prüm proget

Quatter plans, och abitaziuns adüna cun üna grandezza per üna famiglia, cuosts totels da 6 milliuns francs. Quist sun las cifras dal proget vandscheder «Babetin» da l’Atelier Candrian Meier a Turich per la nouva chesa d’abiter immez la vschinauncha da Puntraschigna, davous il center Rondo. Il proget vandscheder da bundant 90 concurrents e concurrentas ho miss in pè la Fundaziun da Puntraschigna i’ls duos ans daspö ch’ella exista. La fundaziun es incumbenzeda da la vschinauncha da sustgnair progets da fabrica u renovaziuns d’abitaziuns cun ün ütil public. Ella dess realiser eir svessa spazi d’abiter per indigens ed indigenas.

Il prüm proget pront

«Quist es nos prüm proget concret», s’allegra Andreas Flury, il president dal cussagl da fundaziun. Ch’els hegian examino, schi pudessan surpiglier abitaziuns da vacanzas per las der a fit permanentamaing u schi pudessan fer quai cun abitaziuns in chesas nouvas. «Ma cul proget vandscheder ‹Babettin› nu vains nus be il culomb sül tet, dimpersè eir il pasler in maun.» I’l plaun terrain da quista chesa sun previs deposits cumünaivels per skis, velos ed oter, per plaun dess que der duos abitaziuns. «E sun duos plauns daro que eir duos staunzas cun duscha e pitschna cuschina cun üna funcziun speciela», infuorma il president da la fundaziun, «quellas dessan pudair gnir dedas a fit scu studio u ch’ellas servan a famiglias chi druvessan üna staunza impü.» Ch’uscheja possan els esser flexibels.

Lavuors da fabrica düraunt il prossem an

Pel mumaint es la fundaziun finanzieda per granda part da la vschinauncha da Puntraschigna. Finanzio dess il proget gnir cun 50 % egens mezs e l’otra mited cun chapitel ester. La vschinauncha vaiva do a la Fundaziun da Puntraschigna ün mez milliun francs chapitel da dotaziun e quist an dess la populaziun da Puntraschigna appruver ün credit da 1,5 milliuns francs per realiser la chesa cun abitaziuns pajablas. Per finanzier tuot la part da la vschinauncha vuless Puntraschigna ramasser raps da donatuors, da la Confederaziun e dal Fonds de roulement. «Quel fond sustegna progets per s-chaffir spazi d’abiter pajabel», declera Andreas Flury, «nus essans optimistics cha que ans gratagia uscheja da finanzier il proget.» Scha tuot vo scu previs cumanzaron las lavuors da fabrica quist an chi vain. «Nos böt es dad avair ün fit-chesa net da maximelmaing 2000 francs al mais.» Planiso es que cha’ls prüms abitants fatschan müdeda d’utuon 2028.