Per en onn igl pi «ot» da Vaz

Cun la midada digl onn ò er scumanzo per las persungas cun en mandat politic tigl cumegn da Vaz la nova perioda da legislatura. Chella cozza anfignen alla fegn digl 2029. L’emda passada èn igls endesch omens e las quatter donnas tgi appartignan agl parlamaint digl cumegn da Vaz sa radunos per l’amprema seduta e chegl ainten la sala polivalenta a Zorten. Per diesch commembers e commembras è la seduta stada ena premiera: Els ed ellas fon part da nov agl cunsegl communal digl cumegn da Vaz. Preschainta alla seduta è er stada l’antiera suprastanza, las persungas tgi appartignan alla cumischung da gestiun ed er igl dus omens e las dus donnas digl cunsegl da scola. Anfignen tar la tscherna digl nov president digl parlamaint ò Maurin Malär, igl mastral mano la seduta.

Gist all’antschatta ò Domenico Margreth fatg la proposta da spustar la tractanda 8, las elecziuns dallas persungas tgi surpeglian en uffezi ainten egna dallas numerousas cumischungs politicas e communals. El ò argumento da spustar las tschernas cun betg aveir retschet igls commembers e las commembras digl parlamaint a taimp la survista da candidats e candidatas per las diversas cumischungs. Ena cumischung tg’è fitg tschartgeda aint igl cumegn da Vaz e per exaimpel la cumischung da biagier. Er la cumischung da planisaziun è da gronda muntada tigl pi grond cumegn da Surmeir e vign er eligeida digl parlamaint. La proposta da Domenico Margreth ò igl cunsegl communal accepto e chegl cun 8:7 vouschs. Saramentadas èn alloura er neidas las 15 persungas tgi furman igl parlamaint pigls proxims quatter onns, igls quatter omens e la donna dalla suprastanza communala e las persungas digl cunsegl da scola.

Elecziun unanima

Igl 2025 è Gian Carlo Bläsi sto vicepresident digl cunsegl communal digl cumegn da Vaz e tenor usit davainta igl vicepresident digl parlamaint igl onn siva president da chel gremi politic e superiour. Sainza ena cuntervousch on igls preschaints e las preschaintas eligia Gian Carlo ­Bläsi scu nov parsoura digl parlamaint e scu successour da Michele Vitali. Igl nov parsoura digl cunsegl communal ò 59 onns, el è commember dalla parteida digl Center e sa posiziunescha pitost dalla vart dretga. Siva digl 2019 appartigna Gian Carlo Bläsi agl cunsegl communal digl cumegn da Vaz. El è er commember dall’Uniun da commers e mastirants Lai ed appartigna alla suprastanza dall’uniun. Igl avost 2025 veva el er candido per la suprastanza digl cumegn da Vaz, dantant sainza esser nia eligia. Cun sia tscherna onorevla è Gian Carlo Bläsi anc anfignen igls 31 da december 2026 igl pi «ot» da Vaz.

Scu vicepresident digl parlamaint digl cumegn da Vaz è nia eligia Fabian Weber. El è siva da quatter onns commember digl cunsegl communal. Alla fegn dalla seduta èn neidas fixadas las datas dallas proximas sedutas digl cunsegl communal. Anfignen la fegn digl 2026 s’inscuntra igl parlamaint digl cumegn da Vaz anc set gedas. Tot tenor temas ed actualitad è er pussebel tgi chel gremi communal s’inscuntra excepziunal.