Giugs, acrobatica e midada da strategia
Il Center Fontauna duei daventar per in baghetg pli attractivs. Las Pendicularas Mustér SA ein promtas d’investir leu rodund nov milliuns francs en ina nova halla per giugs ed acrobatica. Mesjamna decida il cussegl da vischnaunca davart las cundiziuns che pertuccan la vischnaunca, denter auter da relaschar in deivet allas pendicularas. Aschilunsch ch’il project vegn realisaus revegn la vischnaunca a sia strategia d’antruras d’esser possessura da tutt’infrastructura el center.
«Realisaziun parc da giugs e moviment cun center d’acrobatica – dretg da baghegiar e renunzia dil deivet.» Aschia senumna la tractanda principala dalla seduta dil cussegl da vischnaunca da Mustér da mesjamna, ils 28 da schaner 2026. Ella stanza da sedutas Cumiera che sesanfla el Center Fontauna ha il parlament da decider davart in baghetg niev che duess vegnir realisaus sin quei areal. Quel duess vegnir erigius dallas Pendicularas Mustér SA. Per che quei project survegni vigur legala ha il cussegl da vischnaunca da decider da relaschar allas pendicularas in deivet da 1,75 milliuns francs sco era d’approbar il contract dil dretg da baghegiar da 30 onns pigl edifeci niev. Aschilunsch ch’il parlament accepta la proposta dalla suprastonza communala decidan votantas e votants ils 8 da mars 2026 all’urna davart quei project. Cun conceder terren en dretg da baghegiar s’integrescha in baghetg niev ch’ei buc en possess dalla vischnaunca el construct dil Center Fontauna (mira box).
Per giugs ed acrobatica
La nova halla per giugs ed acrobatica duei vegnir erigida gest dalla vart sut dalla halla plurivalenta. Ella consista da duas alzadas a mintgamai 620 meters quadrats. Il project duei vegnir realisaus dallas Pendicularas Mustér SA sil terren che s’auda alla vischnaunca. Las pendicularas vegnan lu era ad esser sezzas responsablas pil menaschi da quei baghetg niev che duei esser part dalla purschida dalla Golden Card. Per reglar ils detagls da quei dretg ha la suprastonza communala elavurau in contract.
Indemnisaziun pil dretg da baghegiar
Pil dretg da quei terren indemniseschan las pendicularas la vischnaunca cun ina summa minimala annuala da rodund 6800 francs duront ils proxims 30 onns. En quei contract vegn era reglau il cass d’in retuorn a tschep ordinari ni anticipau da quei dretg. «La vischnaunca porta neginas rescas finanzialas», scriva la suprastonza communala el messadi per mauns dil cussegl da vischnaunca. Cun quella halla duei vegnir purschiu als affons, giuvenils e geniturs ina nova pusseivladad da sedivertir, leutier cundiziuns idealas pil sport d’acrobatica. Quel ha giu in bien svilup ils davos onns sisum la Surselva.
Ed ils indrezs sanitars?
«La vischnaunca ha iniziau il project e schau elavurar in studi persuenter. Ella sezza ha denton buc ils mieds finanzials da realisar el. En contact cun las Pendicularas Mustér SA ei sedada la soluziun ch’ei ussa sin meisa, concret ch’ellas realiseschan quei baghetg», di il president communal René Epp sin damonda dalla FMR. Tenor il studi elavurau d’in biro d’architectura vegn il project a custar 9,1 milliuns francs, plus/minus 25 %. Ils cuosts san pia svariar per pli che dus milliuns francs ensi ni engiu. «Tuts detagls dil project ein aunc buca enconuschents, per quei motiv sedat quei spazi tiel prezi», declara René Epp. Indrezs sanitars ein buca previ el baghetg. «Visitadras e visitaders san far diever da quels che surveschan oz alla plazza da ballapei e la plazza da glatsch», di il president communal. Lezs ein rodund 40 onns vegls e basegnan per quei motiv probablamein era ina sanaziun. «Quels cuosts van el project dalla halla nova. Sch’ei semuossa ch’igl ei da far ina sanaziun pli gronda vegn la vischnaunca a stuer separticipar vid la finanziaziun. Nus supponin denton che quei seigi buc il cass», di René Epp.
Las pendicularas baghegian
Ella discussiun co endrizzar la halla nova sappi la vischnaunca exprimer ses giavischs, medemamein l’Uniun da gimnastica Cadi cun sia gruppa d’acrobatica. Pertuccont surdada dallas lavurs da baghegiar di René Epp: «En quei grau sa la vischnaunca appellar allas pendicularas da risguardar las interpresas localas e regiunalas. Las pendicularas baghegian denton tenor lur cundiziuns.» Ils 20 da fevrer 2026 eis ei previu d’orientar la populaziun davart il project dalla halla nova per giugs ed acrobatica el Center Fontauna.
Midada da strategia
Avon rodund 30 onns ha la vischnaunca giu decidiu d’acquistar tutt’infrastructura sigl areal ad Acla da Fontauna. A lezzas uras ei quei stau la halla da tennis ed il center da fitness, mo era las plazzas da tennis ch’eran en auters mauns, per part da societads acziunaras. Cun quei acquist ha ella vuliu che tut seigi sut il tetg dalla vischnaunca. Quei ha era giu motivs pertuccont dil menaschi. Ussa va la suprastonza communala puspei la via cuntraria e surlai in baghetg niev ad in’interpresa. «Nus havein aunc adina la pussonza sur dil terren. Leutier havein nus buc ils mieds finanzials per realisar quei baghetg. Cun quella soluziun havein nus buc ina resca finanziala», di René Epp.
Dependenza dallas pendicularas?
Che la vischnaunca sefetschi aschia dependenta el Center Fontauna ni lu forsa era a Segnas cun in eventual center da sanadad dallas Pendicularas Mustér SA refusescha René Epp: «Nus fagein in contract cullas pendicularas e cun lezzas va ei bein. Secapescha che nus essan pertscharts dalla vegliadetgna digl investur Marcus Weber che posseda la maioritad dallas pendicularas. Pertuccont il center da sanadad essan nus aunc buc aschilunsch. Investur leu ston buca las pendicularas esser. Ei marschan era contractivas cul Spital regiunal Surselva», di René Epp. (fmr/hh)
Gust da leger dapli?