Facebook ed Instagram domineschan

La retscherca dall’interpresa Gromann Partner ei vegnida fatga per la tiarza gada igl onn 2025. Egl interval dil davos onn hai dau in grond pass da svilup el diever da medias socialas tier las 2121 vischnauncas svizras. La mesadad dallas vischnauncas han indicau ch’ellas drovien era las medias socialas. Sper Facebook ed Instagram hai per l’emprema gada era dau paucas vischnauncas che han numnau Tiktok e Youtube sco lur canals da communicaziun. Ils auturs dalla retscherca scrivan ch’il diever da medias socialas seigi buca pli ina excepziun, mobein la normalitad tier las vischnauncas svizras.

Era en Surselva

Las vischnauncas sursilvanas ein a basa d’ina retscherca dalla FMR aviartas pil diever da medias socialas. Dallas vischnauncas contactadas han mo Schluein e Trun detg ch’ellas drovien neginas medias socialas. Ferton che Sagogn, Trin e Lumnezia drovan Instagram per communicar, ein las vischnauncas da Laax, Tujetsch, Mustér, Breil e Glion presentas sin Facebook ed Instagram. Laax porscha supplementarmein ina soluziun da Whats­App, quei surtut era per contonscher il public che giavischa da survegnir las novitads sil telefonin.

Cun las plattafuormas pli novas sco Tiktok ni Youtube lavuran aunc neginas vischnauncas en Surselva. Persuenter dat ei vischnauncas sco Lumnezia, Trun e Mustér che lavuran cun la plattafuorma digitala Crossiety. E la vischnaunca da Breil ha installau dacuort in sistem d’informaziun digital cun visurs ellas fracziuns.

Communicaziuns generalas

Las vischnauncas dalla Surselva han tuttas accentuau ch’ellas hagien elaborau in manual cun la moda e maniera da luvrar cullas medias socialas Facebook ed Instagram. Publicadas vegnan communicaziuns d’interess general ed occurrenzas. Protocols, communicaziuns ufficialas dalla suprastonza communala  e per exempel lubientschas da baghegiar vegnien era vinavon publicadas el Fegl ufficial Surselva, hai giu num tier las canzlias communalas.

Regiuns periferas differentas

Ella retscherca dalla firma da communicaziun Gromann Partner stat ei scret ch’ei detti differenzas denter vischnauncas campestras e marcaus pertuccont l’applicaziun da medias socialas. Vischnauncas e marcaus che secattien el center seigien pli activas ella communicaziun sin medias socialas che vischnauncas ora silla tiara. Vischnauncas periferas hagien denton fetg biars followers en cumparegliaziun cun il diember da habitontas e habitonts. La plattafuorma Tiktok che plidenta surtut ils giuvens ei tenor la retscherca aunc buca fetg tschercada en Svizra. Mo 2 % dallas vischnauncas hagien in conto sin la plattafuorma Tiktok.