Cumissiuns communablas a Salouf

«Quest enorm engaschi per ina butia dal vitg ha merità ch’ins dettia ina schanza e sustegnia il project», ha Hubert Müggler ditg envers la FMR. Il suprastant da l’uniun Anavant Surses ha organisà venderdi passà ina visita cun cumissiuns communablas en la Buteia Salouf. Suandada igl invit è la finala ina ventgina d’interessentas ed interessents cun lur tastgas da cumpras. A quellas e quels han ils chaus davos la butia – Gian Sonder, Gianna Sonder e Lyset Sonder – dentant er explitgà il nov concept da la butia ch’è averta durant 24 uras e quai mintga di.

Entrar en La Buteia pon ins numnadamain per il pli be cun ina carta da banca. «Ma nus avain er uras d’avertura cun servetsch da persunal. Alura pon ins entrar senza carta en butia. Quai è mintgamai glindesdi, mesemna, venderdi e sonda tranter las 8.30 e las 11.00», ha la manadra da la butia Lyset Sonder explitgà. I saja ina purschida per persunas che dovrian agid cun il nov concept da La Buteia u per far lur cumissiuns.

Vignogn ha dà segirtad

Ch’ins po insumma anc far cumissiuns a Salouf, quai è tranter auter d’engraziar ad ina gruppa da dunnas, sco che Gian Sonder ha explitgà: «Cura ch’igl ha gì num che la butia dal vitg serria, èn in pèr dunnas intervegnidas ed han dà schlantsch ad in nov project.» Sco ch’il president da la Societad Cooperativa Pro Salouf ha ditg, hajan ins or da lur impuls tschertgà in nov concept e chattà quel en Lumnezia: «A Vignogn devi gia ina tala butia averta da tuttas uras. Suenter che nus l’avain visitada, essan nus stads persvas.» Ins haja era survegnì sustegn dals Lumnezians en cas da dumondas ed en connex cun ils furniturs. «Vignogn ans ha dà segirtad», constatescha Gian Sonder damai.

La Buteia ha dentant era survegnì sustegn da voluntarias e voluntaris, sco che Gianna Sonder ha explitgà venderdi saira a Salouf. Ella è stada ina dals iniziants da la nova butia ed è s’engaschada fermamain per metter sin pais uschè spert sco pussibel La Buteia: «La veglia butia, il Prima, ha serrà la fin d’october. Nossa finamira è stada d’avrir l’entschatta da december. Nus avain pia gì temp in mais per las differentas lavurs da renovaziun e per endrizzar la butia.» E quai è la finala era reussì, tranter auter grazia al sustegn da differentas varts. La Buteia a Salouf è averta dapi ils 5 da december 2025.

Bun’entschatta, ma las sfidas restan

«Enfin uss essan nus cuntents», ha Lyset Sonder ditg guardond enavos sin l’entschatta da la Buteia. Il december sajan las cifras stadas bunas e l’interess grond. «Ma era nus essan pertutgads da la fora da schaner. Quella n’è dentant betg uschè gronda», ha la manadra da la butia agiuntà. Suenter gnanca dus mais èsi pia anc grev da far prognosas. Malgrà la bun’entschatta restian las sfidas numnadamain las medemas sco avant, uschia Gianna Sonder: «Noss custs fixs n’èn probablamain betg pli bass che tar la veglia butia. En cumparegliaziun cun quella stuain nus pia augmentar la svieuta.» Sco ch’igl è vegnì rapportà l’onn passà, haja il Prima a Salouf fatg in deficit annual da plirs dieschmilli francs mintg’onn.

Sco che Gianna Sonder ha ditg, na saja il nov concept dentant betg la suletta midada che duai procurar per dapli entradas: «Nus vegnin adina puspè ad adattar il sortiment a la dumonda da la clientella.» Ins haja per exempel constatà che products da bio sajan fitg populars, uschia Lyset Sonder: «Cunzunt tar persunas d’ordaifer è quai uschia. Quellas apprezieschan en pli er ils products regiunals.» Ed insumma, ins sentia in grond interess per La Buteia. I saja in concept che la glieud sustegna gugent.

Sustegn era da la vischnanca

Sch’i reussescha uschia da procurar per las entradas necessarias, quai sto dentant anc sa mussar. Almain per l’entschatta po La Buteia dentant era quintar cun in sustegn da la vischnanca, uschia Gianna Sonder envers la FMR: «Ils emprims trais onns na stuain nus pajar nagins tschains da locaziun.» I saja be da cuvrir ils custs da l’aua, il stgaudament e sumegliant.

Las premissas paran pia dad esser bunas per La Buteia a Salouf. «Ma sch’i reussescha da mantegnair la butia en il vitg a lunga vista, quai ves’ins pir en dus, trais onns», ha era Hubert Müggler da l’uniun Anavant Surses constatà.