In inscunter cordial

Gievgia passada, ils 22 da schaner 2026, è la Gruppa Cordial sa scuntrada per dar in sguard enavos sin il program da l’onn passà (guarda fotos). A Savognin en l’Hotel Piz Mitgel èn stads preschents 17 participantas e participants. «Spetgà hai jau in pèr dapli», ha il capo-organisatur da la Gruppa Cordial Joachim Wasescha ditg envers la FMR. En tut fetschian numnadamain part radund 70 pensiunadas e pensiunads da lur organisaziun e retschaivian mintgamai il program ed ulteriuras infurmaziuns. E tenor la statistica po Joachim Wasescha savens dumbrar tranter 20 e 30 participantas e participants a las occurrenzas. Il record da l’onn passà è stà ils 6 da november en occasiun da la scuntrada a Tinizong cun 41 preschentas e preschents.

Prest 25 onns Gruppa Cordial

Sco ch’il capo-organisatur ha fatg a savair en pli, po la Gruppa Cordial festivar l’onn 2027 ses 25avel anniversari: «Ensemen cun Viktor Graf hai jau instradà la fundaziun da la gruppa l’onn 2002 cun l’intenziun da porscher in program regular per pensiunadas e pensiunads.» A l’entschatta hajan ins dentant fatg dapli ch’excursiuns e scuntradas il suentermezdi: «Per l’associaziun da turissem avain nus era fatg lavur cumina, per exempel al Lai Barnagn u per mantegnair sendas da viandar.»

Chalà cun la lavur cumina hajan ins enturn l’onn 2015. «Nus n’essan betg pli ils pli giuvens», ha Joachim Wasescha ditg en quest connex. Damai sa focussescha la Gruppa Cordial sin il program da divertiment. Mintgamai l’emprima gievgia dal mais è planisada in’excursiun e la terza gievgia in suentermezdi da gieus, chantar, spassegiar u sumegliant. Sco proxim sin il program è ils 5 da favrer 2026 in’excursiun a Mantogna (Heinzenberg). Silsuenter suondan tranter auter in viadi a Lugano, in’excursiun a Trin en la Ruinaulta e pliras viandadas en la regiun.