Emprender il giug backgammon

Tut che discurra da la digitalisaziun e quant impurtanta che quella è. Betg da smirvegliar che gia ils uffants da scoletta dastgan emprender da dar gieus sin il computer. I saja impurtant d’endisar ils pitschens uschè baud sco pussaivel vi da quest med da communicaziun. I po constar ch’ina avischinaziun a l’informatica è essenziala per la veta professiunala. Malgrà quai fissi er impurtant da betg emblidar co ch’ins dat mulin u «Eile mit Weile», respectiv il num rumantsch «Tgi che va plaun, va saun».

Excepiu dals blers gieus da cartas datti er fitg blers classics da maisa. Jau as cussegl da seser ina giada cun insatgi visavi e d’empruvar da dar in da quels. Empe da guardar en il monitur dal telefonin cussegl jau da giugar mulin, halma, mikado u in auter gieu da maisa. In dals gronds classichers è per exempel backgammon. Quest gieu davan ins gia avant millis onns. Igl era il gieu preferì da pussants, retgs e reginas ed era da Martin Luther. L’emprim num tudestg dal gieu era «Wurfzabel», pli tard ha el survegnì il num «Verkehren». Oz è il num englais «backgammon» derasà generalmain.

Las reglas da quest gieu da maisa ch’ins dat en dus (semegliant a schah) èn dretg cumplitgadas. Mintga giugadur ha a disposiziun 15 craps ch’el sto dumagnar a chasa. Per far ir ils craps sur l’areal da gieu dovran ins mintgamai dus quadrins. Per explitgar tut las reglas da backgammon manca il plaz. Jau as cussegl simplamain d’avischinar al gieu d’empruvar da dar quest classicher.