Il pastur dat vinavon siu fest

«Da principi eis ei vegniu aschia sco quei ch’jeu havevel s’immaginau el pli bi siemi», conceda Hansjörg Sprenger. Il 16avel onn ch’el meina la cuminonza libra da Glion ei in tierm special: El astga surdar la pastoraziun ad in successur. Gl’um dall’annada 1959 ei pensiunaus ufficialmein dapi prest dus onns. Demai ch’igl era buca reussiu da reglar la successiun era el sedecidius da mantener siu post. Hansjörg Sprenger ei teolog, denton buca cun attest dallas baselgias ufficialas. Siu studi ha el absolviu al seminari da Chrischona a Basilea, in’autra cuminonza libra da liunga tradiziun. Il predicatur da Glion declara ch’el s’audi gia ella quarta generaziun tier la cuminonza dalla baselgia libra. «Gia mia basatta fuva commembra da quella», raquenta gl’um ch’ei naschius e carschius si ella vischinonza da Wil, sils cunfins denter Sogn Gagl e Turgovia.

Spazi alla spontanitad

La Baselgia evangelica libra da Glion ei ina cuminonza cristiana independenta ch’ei organisada sco uniun tenor dretg dil cudisch civil svizzer. «Nus essan actualmein 35 commembers. Al survetsch divin dalla dumengia vegnan denton adina denter 50 e 60 persunas», gi Hansjörg Sprenger. Il plevon menziuna ch’ei seigi mintgamai ina sentupada viva e lucca. In survetsch divin dalla baselgia libra ei structuraus pli libers e lai spazi alla spontanitad dils visitaders. Ei vegn cantau e fatg musica, cun ghitarra ed auters instruments. Era astgan participontas e participonts dil survetsch divin preleger. Il plevon tgamuna il cult divin, lai denton spazi a contribuziuns spontanas ord il ravugl.

Cu ina gruppa da cristians da Glion e contuorn ei sedecidida da fundar 1994 quella cuminonza, ha ella gest anflau in local pils cults divins. El marcau vegl, denter la Porta Sura e la baselgia s. Margreta, leu nua che la Strocla Bar ei oz, ha la Baselgia evangelica libra entschiet a sesviluppar. In grond carschen ha ella registrau pér naven da 2013, suenter la bardigliada el quatier Sontga Clau. La claustra dallas soras dominicanas ha schau vi alla cuminonza las localitads vitas dalla scola da tgirunzas. L’anteriura caplutta da s. Hildegard ha survegniu puspei ina funcziun sco liug d’oraziun e devoziun. «Quella sala ei centrala, denton era la caffetaria el plaun sura ei fetg impurtonta per nus», puntuescha Hansjörg Sprenger. Mintga dumengia envida la baselgia libra da Glion ils visitaders a caffè en quella, il local seigi mintgamai stignaus plein, raquenta el, pign e grond gaudi da s’entupar e sebrattar.

In’atmosfera da partenza

Treis baselgias ufficialas dat ei en Svizra, la roman-catolica, la evangelic-reformada e la cristian-catolica. Quellas treis ein d’impurtonza constituziunala ed han il dretg d’incassar ina taglia da cultus. Dasperas dat ei aunc autras cuminonzas. Per exempel als baselgias evangelicas libras. Lezzas ston sefinanziar sesezzas ed ein dependentas da contribuziuns ed unfrendas da lur commembers e visitaders dils priedis. La cuminonza da Glion ch’exista dapi 32 onns registrescha dapresent in’atmosfera da partenza. Sco Hansjörg Sprenger gi, ein ils survetschs divins frequentai fetg bein era da famiglias cun affons pigns.

Era numerus hosps da vacanzas e possessurs da habitaziuns secundaras vegnien la dumengia tier els a priedi, tradescha il pastur dallas olmas e cuntinuescha: «Cun quellas circumstanzias schi legreivlas selegrel jeu da saver seser ellas retschas dils visitaders», gi Hansjörg Sprenger. Il davos miez onn ha l’uniun sespruau da reglar sia successiun. Gl’um che cumplenescha uonn 67 onns ei leds che quei pass ei dumignaus. La radunonza generala dall’uniun ha elegiu David Rivera da Grabs el cantun Sogn Gagl sco plevon niev. La Baselgia libra da Glion festivescha igl 1 da mars 2026 quei tierm en sia historia. «Nus havein grond plascher e vulein parter quel culs hosps che nus havein envidau al survetsch divin festiv», annunzia Hansjörg Sprenger.