Ina persuna enquera tiara ferma

Igl ei buca usitau da tradir all’entschatta co ina historia finescha. Quella cheu ha perinagada ina buna fin. La persuna ch’ei stada pigliada ed exposta a differents prighels sin ina barca amiez igl ozean ha dumignau tuttas smanatschas. Ils pirats han els striunau ed il stemprau ei secalmaus. Sauna e salva ei la persuna arrivada sin tiara ferma. Quei ei il «happy end» dall’aventura. La persuna ha denton duvrau perseveronza e curascha, mo era gl’agid d’enquala creatira beinvulenta. Per exempel la muetta Tschatschra, igl octopus Gnugn, il monster Horribelpersul e la balena Maiestusa. Igl ei las protagonistas ed ils protagonists dil giug musical «Mund sutsu». Per commemorar il giubileum da 20 onns ha la Scola da cant Surselva organisau in project special. Vers protagonists ein denton ils 75 affons, culla menadra Rilana Cadruvi Scherrer e la co-dirigenta Judit Scherrer.

 L’unda gronda ei sederschida

Ellas ed els han presentau in spitachel per egls, ureglias e cor. Ella halla plurivalenta dil center communal a Trun pon ils visitadras e las visitadras esser sesenti sco en in veritabel sutmarin. Cun biars effects da glisch e tuns han els saviu suandar il mund magic. Ils musicists Alfred Achberger (percussiun), Clot Buchli (clarinetta), Riccarda Caflisch (/flauta traversa), Mathias Kleiböhmer (violoncello), Xavier Sonderegger (posauna), Clau Scherrer (clavazin, Joachim Tschann (violina) ed Andrea Thöny (contrabass) han dau il funs all’aventura. Quei orchester professiunal ad hoc ha sunau las partituras ch’il cumponist Lorenz Dangel ha scaffiu aposta pil spitachel.

Il co-autur e reschissur David Flepp ha giu la rolla dil raquintader. El ha fatg la punt da scena tier scena e descret l’acziun. Sin tribuna han ils affons da tuttas vegliadetgnas giugau lur rollas e cantau en gruppas. Remo Arpagaus ei staus responsabels pils costums ed Annadora Friberg pil maletg da tribuna e las visualisaziuns. Quellas parts han susteniu gl’effect general dall’aventura musicala. In effect da surpresa ha ei dau per exempel cu l’unda gronda ei sederschida sur la barca: Duas giugaduras han stendiu in liung umbrival sur tuts. La muetta Tschatschra ha il chor dils pigns giugau. Els eran vestgi en treners grischs cun capuzza, vid lezza ils egls dalla muetta ed ils vons oranschs sco greflas digl utschi dalla mar. Ils costums digl octopus cun ses tentachels ei in ulteriur exempel dalla producziun creativa.

Atmosfera fantastica

Musica e cant da hip hop e da film, cumbinada cun ideas surprendentas, ha dau veta allas scenas. Il cant ed ils effects, colurs, nebla e tuns dil suffel han teniu la tensiun. Silla barca ha la persuna persula, representada dil collectiv, stuiu tener ensemen per dumignar il grond stemprau. Ils pirats ein sfundrai ella buglia grazia ad ina fuormla magica ch’il chor ha recitau.

La barca amiez la mar – sura in tschiel plein steilas, sut la profunditad bletscha – ha sfurzau dad esser units e d’encurir sligiaziuns. «Unitad dat forza» pudess esser il messadi. «Quei ei stau ina prestaziun professiunala», ha ina visitadra incantada manegiau en discuors culla FMR. Ed il consort ha aschuntau: «Strusch da crer cun tgei preschientscha e segirtad che quels affons ein semovi ed han cantau». In’autra visitadra ha commentau: «Ins ei vegnius fiers viaden en in’atmosfera fantastica». Ils affons hagien giugau grondius, ei seigi ina producziun collectiva da smarvegl, ha ella manegiau.